Samsung ardıcıl 19-cu il dünya televizor bazarının lideri olub

     Samsung 2024-cü ilin nəticələrinə əsasən ardıcıl 19-cu il dünya televizor bazarının lideri olub. Şirkət premium seqmentdə, ultra-böyük ekranlı modellərdə və QLED televizor bazarında birinci yeri tutub. Digər tərəfdən, LG ardıcıl 12-ci il OLED televizor bazarının ən böyük istehsalçısı olaraq mövqeyini qoruyub. Bu məlumatlar Omdia şirkətinin araşdırmasına əsaslanır. 2024-cü ildə Samsung-un qlobal televizor bazarındakı payı 28.3% təşkil edib, beləliklə, şirkət 2006-cı ildən bəri qoruduğu liderliyini davam etdirib. Premium seqmentdə (2500$ və yuxarı qiymət aralığında) Samsung bazarın 49.6%-ni ələ keçirib.

     75 düym və daha böyük ölçülü ekrana sahib televizorlar bazarında isə şirkətin payı 28.7% olub, bu da onu bu kateqoriyada dünya lideri edir. 2024-cü ildə qlobal QLED televizor bazarı artım göstərdi və ilk dəfə ümumi satışların 10%-dən çoxunu təşkil etdi. Samsung bu seqmentdə 8.34 milyon ədəd QLED televizor sataraq 46.8% bazar payına sahib oldu. Şirkət 2024-cü ildə 1.44 milyon ədəd OLED televizor satıb, bu da qlobal bazarın 27.3%-nə bərabərdir.

     Bu nəticə OLED satışlarının ötən illə müqayisədə 42% artdığını, bazar payının isə 4.6% yüksəldiyini göstərir. LG 2024-cü ilin nəticələrinə əsasən ardıcıl 12-ci il OLED televizor bazarının dünya lideri olub. Şirkət yalnız dördüncü rübdə 1.1 milyon OLED televizor satıb. İl ərzində isə ümumilikdə 3.18 milyon ədəd OLED televizor sataraq qlobal bazarın 52.4%-ni ələ keçirib. 75 düym və daha böyük ekranlı OLED modelləri seqmentində LG dünya bazarının 57.5%-nə sahib olub. Bundan əlavə:

- 1500$ və daha bahalı OLED televizorlar bazarının payı 45%-ə çatıb, bu isə ötən illə müqayisədə 8.5% artım deməkdir

- 75 düym və daha böyük OLED televizorların bazar payı rekord həddə - 16%-ə yüksəlib.

     LG 2024-cü ildə ümumilikdə 22.6 milyon televizor (OLED və LCD daxil olmaqla) satıb, bu isə qlobal bazarın 16.1%-ni təşkil edir. Şirkət 2025-ci ildə OLED televizorlarının tədarük payını 53.8%-ə çatdırmağı planlaşdırır. Keçən il dünya üzrə ümumilikdə 208.83 milyon ədəd televizor satılıb, bu da ötən illə müqayisədə 3% artım deməkdir. Bu nəticə qlobal televizor bazarının 3 illik durğunluqdan sonra ilk dəfə böyüməyə başladığını göstərir. Bütün istehsalçıların ümumi OLED televizor tədarükü 6.07 milyon ədədə çatıb, bu isə 8%-dən çox artım deməkdir. Beləliklə, OLED seqmenti bazarın ümumi artım tempindən daha sürətlə inkişaf edir.

Mənbə: Omdia