Samsung Buds On qulaqlığını və SmartTag 3 izləyicisini satışa çıxardı

    “Samsung” ABŞ bazarında “Galaxy Buds On” qulaqlığını və “Galaxy SmartTag 3” trekerini satışa çıxarıb. Qulaqlıq 229.99 dollara (təxminən 390 manat) satılır. Trekerin qiyməti 29 ilə 29.99 dollar (təxminən 49 ilə 51 manat), 4 ədədlik dəstin qiyməti isə 99 ilə 99.99 dollar (təxminən 170 manat) arasındadır. “Galaxy SmartTag 3” ötən ay elan olunmuşdu. Qulaqlığın 6 noyabrda satışa çıxacağı da əvvəlcədən açıqlanmışdı.

    “Galaxy Buds On” qulaq kanalına girmir, qulağın xarici hissəsinə bərkidilir. Beləliklə, musiqi dinləyərkən ətrafdakı səsləri də eşitmək olur. Modeldə aktiv küy azaltma funksiyası yoxdur, bas səsləri də ənənəvi qulaqlıqlardakı qədər güclü deyil. Buna baxmayaraq, qulaqlıq flaqman “Galaxy Buds 4 Pro” modelindən cəmi 20 dollar (34 manat) ucuzdur.

    Qulaqlıqda 11,3 mm-lik “TwinBoost” dinamiklər var. Səs avtomatik tənzimlənir, xüsusi texnologiya isə səsin kənara yayılmasını azaldır. “Gemini Live” süni intellekt köməkçisi də işləyir. Zəngləri baş hərəkətləri ilə idarə etmək olur. Şarj qutusu ilə ümumi işləmə müddəti 38 saata çatır, ancaq bəzi funksiyalar üçün uyğun “Galaxy” cihazı lazımdır.

    “Galaxy SmartTag 3” əvvəlki modeldən 35% kiçik və 33% yüngül hazırlanıb. Daha yığcam korpus trekeri daşımağı asanlaşdırır, amma əvvəlki nəsildə olan daxili ilgək çıxarılıb. Cihaz “Galaxy Find” şəbəkəsində işləyir və “Google Find My Device” şəbəkəsinə qoşulmur. “iPhone” ilə yalnız “SmartThings Find” tətbiqi üzərindən əsas bağlantı qurmaq olur. “Compass View”, “Ring Phone” və “Left Behind Alert” funksiyaları “iOS” sistemində işləmir.

    Treker “Bluetooth 6.0 Channel Sounding” və UWB adlı yaxın məsafəli bağlantı texnologiyası ilə əşyanın yerini daha dəqiq müəyyənləşdirir. Avtomatik əmrləri işə salmaq, əşya geridə qaldıqda xəbərdarlıq almaq və məkan tarixçəsinə baxmaq olur. Cihazda 550 günədək batareya ömrü var. Enerjiyə qənaət rejimində bu müddət 790 günə çatır. IP67 qoruması trekeri toza və suya qarşı davamlı edir. Qara və ağ rənglər satılır. 4 ədədlik dəstdə hər rəngdən 2 treker var. Ev heyvanları üçün ayrıca yaxalıq aksessuarı da satılır.