Samsung Galaxy Buds qulaqlıqlarını eşitmə cihazına çevirəcək

    Samsung Galaxy Buds qulaqlıqlarını təkcə musiqi dinləmək üçün deyil, eşitmə cihazı kimi də istifadə etməyə imkan verəcək yeni funksiya təqdim etməyə hazırlaşır. Şirkətin Galaxy Buds üçün hazırladığı eşitmə dəstəyi funksiyası ABŞ Qida və Dərman Administrasiyası (FDA) tərəfindən təsdiqlənib. Yeni funksiya bu ilin sonlarına doğru ABŞ və bəzi digər ölkələrdə Galaxy Buds 3 Pro və Galaxy Buds 4 Pro modelləri üçün istifadəyə veriləcək. Bununla yanaşı, istifadəçilərə qulaqlıqlar vasitəsilə eşitmə testi aparmaq imkanı da yaradılacaq.

    Samsung-un bildirdiyinə görə, eşitmə testi təxminən 5 dəqiqə çəkəcək və tibbi səviyyəyə uyğun nəticələr təqdim edəcək. Test uyğun Galaxy smartfonunda Galaxy Buds parametrləri üzərindən başladılacaq. Sistem hər qulağı ayrıca yoxlayacaq və istifadəçinin eşitməsini normal və ya eşitmə itkisinin dörd səviyyəsindən biri, yüngül, orta, ağır və ya dərin olaraq qiymətləndirəcək. Testin nəticələrinə Samsung Health tətbiqindən baxmaq mümkün olacaq.

    Nəticələr əsasında Galaxy Buds istifadəçinin eşitməkdə çətinlik çəkdiyi səsləri avtomatik gücləndirə biləcək. Məsələn, pıçıltılar, uzaqdan gələn səslər və yüksək tezlikli səslər daha aydın eşidilə biləcək.