Hələ təqdim edilməmiş Samsung Galaxy S23 FE smartfonu barəsində məlumatlar internetdə ortaya çıxmağa davam edir. Bu dəfə insayderlər sözügedən smartfonun yeni render fotolarını təqdim ediblər. Təqdim edilmiş render fotolarda smartfon Graphite adlı gövdə rəngində əks olunub. Render fotolardan da görmək olar ki, Galaxy S23 FE xarici görünüşcə adi Galaxy S23 modelinə bənzəyəcək. Smartfon yastı ekran ilə təchiz olunacaq və ekranın yuxarı mərkəz hissəsində ön kamera üçün kiçik dairəvi çıxıntı yerləşəcək.

    Arxa paneldə isə 3 ədəd kamera obyektivi yerləşəcək. Son məlumat sızıntılarına əsasən Galaxy S23 FE smartfonu 120 Hz-lik təsvir yenilənməsinə sahib Full HD+ keyfiyyətli 6.4 düym Dynamic AMOLED ekranla təchiz olunacaq. Smartfon satılacağı regiondan asılı olaraq Snapdragon 8 Gen 1 və ya Exynos 2200 prosessoruna sahib olacaq. Bundan əlavə olaraq Galaxy S23 FE özündə 50 MP + 12 MP + 8 MP üçlü arxa kameranı, 10 MP-lik ön kameranı və 25 vatt gücündə sürətli şarj texnologiyalı 4500 mAh enerji tutumlu batareyanı birləşdirməlidir. Smartfonun bu ilin sonuna kimi təqdim olunacağı gözlənilir.