Hələ təqdim olunmamış Samsung Galaxy S23 FE smartfonu barəsində daha çox məlumat ortaya çıxır. Dünən sözügedən smartfonun yeni fotosu təqdim edilmişdi. İndi isə My Drivers saytı Galaxy S23 FE-nin texniki göstəriciləri barəsində məlumatlar verib. Beləliklə verilmiş məlumatlara əsasən Galaxy S23 FE smartfonu 120 Hz-lik təsvir yenilənməsinə sahib 2340x1080 piksel keyfiyyətli 6.3 düym ekranla təchiz olunacaq.

    Smartfon satışa çıxacağı regiondan asılı olaraq iki müxtəlif prosessora sahib ola bilər. Yəni smartfon Şimali Amerika bazarı üçün Snapdragon 8 Gen 1-i, digər bazarlar üçün isə Exynos 2200-ı əldə edə bilər. Bundan əlavə olaraq məlumatda qeyd edilib ki, Galaxy S23 FE özündə 8 GB RAM-ı, 128/256 GB daxili yaddaş həcmini, 50 MP + 12 MP + 8 MP üçlü arxa kameranı və 10 MP-lik ön kameranı birləşdirəcək. Batareya həcminə gəldikdə isə smartfon 25 vatt gücündə sürətli şarj texnologiyalı 4500 mAh enerji tutumlu batareyaya sahib olmalıdır.