Samsung Galaxy S24 smartfonlarının ekran qoruyucuları ortaya çıxıb

     Samsung Galaxy S24 smartfon seriyası barəsində ortaya çıxmış son məlumat sızıntılarında qeyd edilir ki, bu seriyanın smartfonları yastı ekranlara sahib olacaqlar. İndi isə bu məlumatı təsdiq edən sübut ortaya çıxıb. Belə ki, Ice Universe ləqəbli məşhur insayder Galaxy S24 smartfon seriyasının ekranları üçün nəzərdə tutulmuş qoruyucu şüşələrin əks olunduqları fotonu təqdim edib. Galaxy S24 və S24+ üçün yastı ekranlar gözlənilən idisə, Galaxy S Ultra modeli üçün bu cür ekran birinci dəfə reallaşdırılacaq. Qeyd etmək lazımdır ki, Galaxy S24 smartfon seriyasının yanvar ayında təqdim olunacağı gözlənilir. Son məlumat sızıntılarına əsasən Galaxy S24 və Galaxy S24+ modelləri satışa çıxacaqları regiondan asılı olaraq Snapdragon 8 Gen 3 və ya Exynos 2400 prosessoru, Galaxy S24 Ultra modeli isə bütün regionlarda Snapdragon 8 Gen 3 prosessoru ilə təchiz olunacaq.