Samsung Galaxy S27 istehsalında Ultra və Pro-nun payı 70%-i aşacaq

    “Samsung” 2027-ci ilin əvvəlində “Galaxy S27” seriyasını 4 modellə çıxarmağa hazırlaşır. Şirkət istehsal imkanlarının 70 faizdən çoxunu “Galaxy S27 Ultra” və yeni “Galaxy S27 Pro” modellərinə ayırmağı planlaşdırır. Beləliklə, standart “Galaxy S27” və daha böyük “Galaxy S27+” daha az sayda istehsal olunacaq. Bu plan alıcıların daha bahalı modellərə üstünlük verəcəyinin gözlənildiyini göstərir.

    Müqayisə üçün, 2026-cı ildə “Galaxy S26 Ultra” seriyanın ümumi istehsalının təxminən 50 faizini əhatə edib və modeldən 18 milyon ədəd buraxılıb. “Samsung” 2027-ci ildə “Galaxy S27 Ultra” istehsalını da təxminən 18 milyon səviyyəsində saxlamaq istəyir. Yeni “Galaxy S27 Pro”dan 7-8 milyon ədəd istehsal planlaşdırılır. “Galaxy S” seriyasının ümumi istehsalı adətən 35 milyon ədəd olur.

    “Galaxy S27 Pro” bəzi xüsusiyyətlərinə görə “Ultra” modelinə yaxın olacaq. Telefonda ekrana yandan baxıldıqda məzmunun görünməsini məhdudlaşdıran “Privacy Display” funksiyasının olacağı gözlənilir. Dizaynı da “Ultra”ya bənzəyə bilər. Ancaq modeldə “S Pen” qələmi işləməyəcək və qiyməti “Galaxy S27 Ultra”dan aşağı olacaq. Dəqiq qiymətlər hələ açıqlanmayıb.

    Yeni “Pro” modelinin standart “Galaxy S27” və “Galaxy S27+”a olan tələbin bir hissəsini özünə çəkməsi gözlənilir. Hesablamalara görə, bu 2 modelin potensial satışlarının təxminən 20 faizi daha bahalı “Galaxy S27 Pro”ya keçə bilər. Telefonun ölçüsünün “Galaxy S27+”dan çox da kiçik olmayacağı ehtimal edilir. Qiyməti də əvvəlki “Plus” modellərinin səviyyəsinə yaxın ola bilər.

    “Samsung”un daha bahalı telefonlara yönəlməsi son satış nəticələrinə də uyğundur. Yenilənmiş “Galaxy Z Fold 7” 2025-ci ildə, “Galaxy Z Fold 8” isə 2026-cı ildə böyük maraq görüb. “Galaxy S26 Ultra” 2026-cı ilin 2-ci rübündə ən çox satılan “Android” smartfonu olub. Bununla belə, qiymət artımlarının gələcək tələbə necə təsir edəcəyi hələ aydın deyil.