Samsung Galaxy Z Fold 7 birinci nəsil Galaxy Fold-dan 2 dəfə daha nazik ola bilər

     Samsung yeni bir rekorda imza atmağı planlaşdırır - Galaxy Z Fold 7 bazarda ən nazik qatlana bilən smartfon ola bilər. İnsayderlərin məlumatlarına görə cihaz qatlanmış halda cəmi 8.2 mm gövdə qalınlığına malik olacaq. Bu, OPPO Find N5-in (8.9 mm) qalınlığından azdır və əvvəlki model olan Galaxy Z Fold 6-dan 30%-dən çox nazikdir. Əgər bu təsdiqlənərsə, Galaxy Z Fold 7 tarixdəki ən nazik “kitab” formatlı smartfon olacaq. Sızıntıya əsasən, yeni model birinci nəsil Galaxy Fold-dan demək olar ki, 2 dəfə, ötən ilki modeldən isə 4 mm daha nazik olacaq.

     Bu irəliləyiş gözlənilməz sayılır, çünki daha əvvəl cihazın qalınlığının 9.5 mm olacağına dair daha real ehtimallar səsləndirilmişdi. Samsung-un bu incəlik səviyyəsinə necə nail olacağı hələlik məlum deyil. Şirkət, ehtimal ki, S Pen stilusunun  iş prinsipini dəyişəcək və daxili rəqəmsal qatı Apple Pencil-a bənzər yanaşma ilə əvəz edəcək. Gözlənilir ki, Galaxy Z Fold 7 smartfonu Snapdragon 8 Elite prosessoru ilə təchiz olunacaq, bu da ona Honor Magic V3 və OPPO Find N5 kimi daha nazik rəqiblərlə rəqabət aparmaq imkanı verəcək. Smartfonun qiymətinin 1900$-ı aşması yüksək görünsə də, cihazın kompakt ölçüləri bu dəyəri əsaslandıra bilər. Lakin hələlik bunlar yalnız şayiələrdir və dəqiq detallar yay fəslində keçiriləcək Galaxy Unpacked təqdimatında məlum olacaq.