Samsung şirkətinin gələcək flaqman smartfonları barəsində demək olar heçnə məlum deyil. Lakin onlar barəsində şayiələr artıq internetdə yayılır. İnsayderlərin verdikləri məlumatlara inansaq, Samsung-un Galaxy S seriyasını yaxın gələcəkdə dizayn baxımından ciddi dəyişikliklər gözləyir. Beləliklə verilmiş məlumatlara əsasən Samsung yaxın bir neçə il ərzində öz smartfonlarının gövdələrində fiziki düymələrdən tam şəkildə imtina etməyi planlaşdırır. Məlumatda qeyd edilib ki, şirkət gələcək flaqman smartfonlarında fiziki yandırıb/söndürmə və səsin tənzimlənməsi düymələrindən imtina edəcək. Fiziki düymələri sensorlu düymələr və ya proqram təminatının özü əvəzləyə bilər.

    Bununla belə şirkət bu cür dəyişikliyi 2025-ci ildən tez reallaşdırmayacaq. Buna görə də gələn il təqdim olunacaq Galaxy S23 seriyası, Galaxy Z Fold 5 və Galaxy Z Flip 5 smartfonları ənənəvi idarəetmə düymələri ilə təchiz olunacaqıar. İnsayderlər həmçinin fiziki düyməsiz dizayna sahib olacaq Samsung smartfonunun konsept fotosunu da təqdim ediblər. Heç istisna deyil ki, Samsung fiziki düymələrə sahib olmayan Galaxy S smartfonlarını məhdud sayda öz biznes müştəriləri üçün təqdim etsin. Bu halda adi alıcılar üçün nəzərdə tutulacaq smartfonlar ənənəvi fiziki düymələri özlərində birləşdirəcəklər. Ortaya çıxmış bu məlumatın rəsmi şəkildə təsdiqlənməməsi səbəbilə ona bir qədər şübhə ilə yanaşmaq lazımdır. Samsung-un özü isə gələcək smartfonlarının dizaynları barəsində heç bir fikir bildirməyib.