Samsung robot texnologiyalarını vahid bölmədə birləşdirdi

    Samsung Electronics robot texnologiyaları sahəsində fəaliyyətini genişləndirmək məqsədilə birbaşa şirkətin baş icraçı direktoru Roh Tae-muna tabe olan yeni RX (Robotics eXperience) bölməsini yaradıb. Yeni struktur şirkətin robot texnologiyalarını gələcək əsas inkişaf istiqamətlərindən birinə çevirmək planının tərkib hissəsidir. 21 iyul tarixində elan olunan dəyişiklik Samsung-un mobil cihazlar və məişət elektronikası seqmentlərində gəlirlərin azalmasını yeni biznes sahələri ilə kompensasiya etmək strategiyasına uyğun həyata keçirilib. Yeni RX bölməsi robot texnologiyalarının uzunmüddətli strategiyasına, əsas texnologiyaların hazırlanmasına və məhsulların kommersiyalaşdırılmasına cavabdeh olacaq.

    Bölmənin rəhbəri vəzifəsinə əvvəllər Hyundai Motor Group-da, o cümlədən Boston Dynamics ilə bağlı robot strategiyasına rəhbərlik etmiş Li Donq Kun təyin olunub. Bundan əlavə, Samsung Seul Milli Universitetindən avtonom robotların idarə edilməsi üzrə mütəxəssis Kim Hyoun-jin və Ajou Universitetindən robot əlləri sahəsində çalışan Kim Ui-kyumu da komandaya cəlb edib. Şirkət bu sahəyə sıfırdan başlamır. Samsung 2024-cü ilin sonunda Cənubi Koreyanın Rainbow Robotics şirkətindəki payını təxminən 35 faizə çatdıraraq onun ən böyük səhmdarına çevrilmişdi. Tərəflər Samsung-un süni intellekt və proqram təminatı imkanlarını Rainbow Robotics-in robot texnologiyaları ilə birləşdirərək humanoid robotların hazırlanmasını sürətləndirməyi planlaşdırırlar.

    Məlumata görə, RX bölməsi Samsung-un Seuldakı tədqiqat mərkəzində fəaliyyət göstərəcək. Şirkət həmçinin Gumi şəhərində sənaye mühitindən toplanacaq məlumatlarla robotları öyrətmək üçün xüsusi məlumat mərkəzi yaratmağı, gələcəkdə isə ABŞ, Çin və Yaponiyada yeni tədqiqat mərkəzləri açmağı planlaşdırır.