Samsung SmartThings Matter standartını necə inkişaf etdirir?

    Technote.az “Apple Insider” platformasına istinadən bildirir ki, Samsung-un ağıllı ev platforması olan SmartThings və ağıllı ev cihazları üçün vahid standart sayılan Matter texnologiyası “Smart Home Insider” podkastının yeni buraxılışında müzakirə olunub. Verilişin qonağı həm Samsung SmartThings komandasında çalışan, həm də CSA (Connectivity Standards Alliance) təşkilatında Matter Marketinq və Məhsul Alt Qrupunun sədri vəzifəsini icra edən Daniel Moneta olub.

    Daniel Moneta bildirib ki, SmartThings platforması Matter standartının inkişafı və yayılmasında aktiv rol oynayır. Matter müxtəlif istehsalçıların ağıllı ev cihazlarının bir-biri ilə uyğun işləməsini təmin edən standartdır və məqsədi istifadəçilərin fərqli ekosistemlər arasında problem yaşamamasıdır. Podkastda SmartThings-in Matter inteqrasiyası, ekosistemlərin bu standartı necə qəbul etdiyi və gələcək inkişaf istiqamətləri müzakirə edilib.

    Buraxılışda ağıllı ev sahəsində digər yeniliklər də diqqət çəkib. Belə ki, aşağı büdcəli körpə müşahidə kameralarında ciddi təhlükəsizlik boşluğu aşkarlanıb. Meari Technology şirkətinin müxtəlif markalar üçün istehsal etdiyi kameralarda aşkar olunan boşluq nəticəsində tədqiqatçının dünyanın müxtəlif ölkələrində yerləşən cihazlara giriş əldə edə bildiyi bildirilib. Problem sonradan aradan qaldırılsa da, mütəxəssislər bu cihazların dəyişdirilməsini tövsiyə edirlər.

    Digər tərəfdən, Homey ağıllı ev platforması artıq Android TV, webOS və hətta Tesla avtomobillərinin daxili brauzerlərində də istifadəyə verilib. Bununla yanaşı, Netflix-in də istifadəçilərə məzmun seçməkdə kömək edəcək süni intellekt əsaslı səs köməkçisi üzərində işlədiyi iddia edilir. Həmçinin sızdırılan məlumatlara görə, Google yeni ağıllı ekran üzərində çalışır. Yeni cihazın 2026-cı ilin payızında təqdim olunacağı gözlənilən Apple-ın ağıllı ev ekranına rəqib ola biləcəyi qeyd edilir.