Sennheiser Momentum 5 təqdim edildi

    Technote.az “The Verge” platformasına istinadən bildirir ki, Sennheiser şirkəti yeni nəsil Sennheiser Momentum 5 Wireless qulaqlıqlarını təqdim edib. Təxminən 4 ildən sonra yenilənən model əvvəlki nəsil Momentum 4 ilə oxşar dizaynı qoruyub saxlasa da, texniki tərəfdən bir sıra vacib yeniliklər əldə edib. Yeniliklər arasında xüsusilə təkmilləşdirilmiş aktiv səsboğma sistemi (ANC) və ilk dəfə istifadəçi tərəfindən dəyişdirilə bilən batareya diqqət çəkir.

    Yeni model iyunun 30-dan etibarən satışa çıxacaq və qiyməti 399,99 dollar olacaq. Bu isə əvvəlki Momentum 4 modelindən 50 dollar daha yüksək qiymət deməkdir. Momentum 5 Wireless qulaqlıqları əvvəlki nəsillərdə olduğu kimi 42 mm sürücülərlə təchiz olunub. Bununla yanaşı cihaz artıq “Hi-Res Audio” sertifikatı alıb və AptX Lossless kodekini dəstəkləyir. Bu texnologiya uyğun cihazlarda CD keyfiyyətində, 16-bit/44.1 kHz səviyyəsində səs ötürülməsinə imkan verir. Bu funksiya yalnız Qualcomm Snapdragon Sound platformasını dəstəkləyən cihazlarla işləyəcək. Hazırda bəzi Sony və Motorola smartfonları uyğun hesab edilsə də, Samsung, Google və Apple cihazları siyahıya daxil deyil.

    Sennheiser yeni modeldə mikrofon sayını da artırıb. Momentum 5-də hər tərəfdə 4 olmaqla ümumilikdə 8 mikrofon istifadə olunur. Şirkətin sözlərinə görə, bu dəyişiklik səsboğma imkanlarını əhəmiyyətli dərəcədə artırır və xüsusilə insanların danışıq səsləri və təyyarə kabinəsindəki fon səs-küyünü azaltmaqda əvvəlki modellə müqayisədə 3 dəfəyə qədər daha effektiv nəticə verir.

    Bundan əlavə, əlavə mikrofonlar zəng keyfiyyətinə də müsbət təsir göstərir. Həm istifadəçinin səsinin qarşı tərəfə ötürülməsi, həm də qəbul edilən səs keyfiyyəti yaxşılaşdırılıb. Batareya ömrünə gəldikdə isə Momentum 5 ANC aktiv vəziyyətdə maksimum 57 saata qədər işləyə bilir. Bu göstərici əvvəlki Momentum 4-dəki 60 saatdan bir qədər az olsa da, bazardakı bir çox rəqibi üstələyir. Yeni model həmçinin Dolby Atmos, baş hərəkətlərini izləyən "Spatial Audio", daha kiçik daşıma qutusu və gələcək proqram yeniləməsi ilə Bluetooth 6.0 dəstəyi kimi imkanlarla da təchiz olunub.