Sevilən Android flaqmanı 50 %-ə yaxın ucuzlaşıb

    Technote.az “The Verge” platformasına istinadən bildirir ki, yeni Android smartfon axtaranlar və ya son dəqiqə hədiyyəsi düşünənlər üçün Google Pixel 10 hazırda bazarda ən cəlbedici seçimlərdən biridir. Hazırda Amazon üzərindən PIXEL10 promo kodundan istifadə etməklə cihazı 449 dollara (350 dollar endirimlə) almaq mümkündür. Bu, Pixel 10 üçün indiyə qədər qeydə alınmış ən aşağı qiymətdir.

    Daha güclü kamera və böyük ekran istəyənlər üçün Pixel 10 Pro modeli 649 dollara, Pixel 10 Pro XL isə 799 dollara (400 dollar endirimlə) təklif olunur. Hər üç model eyni promo kodla əldə edilə bilər. Telefon 6.3 düymlük OLED ekran, 120 Hz yenilənmə tezliyi və 3000 nit maksimum parlaqlıq ilə günəş altında belə rahat istifadə imkanı yaradır. Pixel 10-un ən maraqlı yeniliklərindən biri isə Qi2 maqnitli simsiz şarj texnologiyasıdır. Bu xüsusiyyət sayəsində ayrıca maqnitli korpusa ehtiyac qalmır və şarj daha dəqiq və rahat həyata keçirilir. Bundan əlavə, bu modeldə Google Tensor G5 prosessoru istifadə olunub ki, bu çip Pro modellərlə eynidir.

    Kamera tərəfində isə Pixel 10 ilk dəfə olaraq telefoto kamera ilə təchiz olunub ki, bu da portret çəkilişlərini daha keyfiyyətli edir. Doğrudur, əsas və ultra-geniş kamera Pro modellərlə müqayisədə bir qədər zəifdir, lakin gündəlik istifadə üçün çəkilən fotolar tam qənaətbəxşdir. Normal satış qiyməti 799 dollar olan Pixel 10 artıq həmin məbləğə belə yaxşı seçim sayılırdı. 449 dollar qiymət etiketi ilə isə bu model bazardakı ən sərfəli Android flaqmanlarından birinə çevrilir.