Sony Afeela-nın CES 2026 mətbuat konfransını necə izləmək olar?

    Technote.az “Engadget” platformasına istinadən bildirir ki, Sony-nin mətbuat konfransı adətən sərginin rəsmi açılışından bir gün əvvəl keçirilən “press day”in son böyük tədbiri olur. CES 2026-da da bu ənənə qorunur, lakin bu dəfə mühüm bir fərqlə... Sony tədbiri demək olar ki, tamamilə elektrik avtomobillərinə həsr edəcək.

    Məlumata görə, tədbirin mərkəzində Sony Honda Mobility tərəfindən hazırlanan iki model dayanacaq: artıq bir neçə ildir CES səhnəsində görünən Afeela 1 və ilk dəfə təqdim olunacaq tamamilə yeni konsept avtomobil. Sony Afeela CES 2026 mətbuat konfransı Las-Veqasdan canlı yayımlanacaq. Tədbir 5 yanvar, bazar ertəsi keçiriləcək. Canlı yayımı Afeela-nın rəsmi YouTube kanalı üzərindən izləmək mümkün olacaq. Yayım linki aktiv olduqdan sonra adətən tədbir səhifələrində də yerləşdirilir. Hazırda Afeela 1 kimi tanınan model ilk dəfə CES 2020-də Vision-S adı altında təqdim olunmuşdu. Son illər ərzində avtomobilin texniki xüsusiyyətləri və qiyməti ilə bağlı mühüm detallar açıqlanıb. Modelin başlanğıc qiyməti 89 900 dollar səviyyəsindədir ki, bu da onu premium elektromobil seqmentində kifayət qədər iddialı mövqeyə çıxarır.

    Bununla belə, əvvəlki CES sərgilərində Afeela 1 ilə bağlı ilkin təəssüratlar birmənalı olmayıb. Xüsusilə texnologiya və dizayn baxımından avtomobilin bazardakı rəqiblərlə müqayisədə geridə qaldığına dair fikirlər səsləndirilib. CES 2026-da isə Sony Honda Mobility-nin bu tənqidlərə hansı yeniliklərlə cavab verəcəyi əsas maraq doğuran məqamlardan biridir. Şirkət rəsmi açıqlamasında bildirib ki, CES stendində müxtəlif rəng variantlarında bir neçə Afeela 1 ön-istehsal modeli, həmçinin tamamilə yeni Afeela konsept avtomobili nümayiş olunacaq. Bu da o deməkdir ki, tədbirdə yalnız mövcud modelin yenilənməsi deyil, gələcək dizayn və texnologiya baxışı da ortaya qoyulacaq.