Switch 2 Avropada yeni versiya ilə satışa çıxacaq

     Nintendo Avropa İttifaqının qaydalarına uyğun olaraq 2027-ci ildən etibarən istifadəçilərin özlərinin asanlıqla dəyişdirə biləcəyi batareyaya malik Switch 2 versiyasını təqdim edəcəyini təsdiqləyib.

    Şirkət yaydığı açıqlamada bildirib ki, 2023-cü ildə qəbul edilən Aİ qaydalarına uyğunlaşmaq üçün yeni məhsul versiyaları hazırlayır. Qanuna əsasən, 18 fevral 2027-ci ildən etibarən müəyyən elektron cihazlarda batareyalar istifadəçi tərəfindən xüsusi alətlər olmadan dəyişdirilə bilməlidir.

    Nintendo birbaşa olaraq Switch 2-nin yeni versiyasını təqdim edəcəyini deməsə də, açıqlamada “BEE” kodu ilə başlayan məhsullar üçün uyğunlaşdırılmış modellərin hazırlandığını qeyd edib. Bu kod isə Switch 2 konsollarına, onların aksesuarlarına və oyunlarına aiddir.

    Yeni, dəyişdirilə bilən batareyaya malik modellər ayrıca məhsul kimi satışa çıxarılacaq və qablaşdırmalarında “OSM” işarəsi yer alacaq. Görünən odur ki, bu versiyalar yalnız Avropa İttifaqı bazarı üçün nəzərdə tutulub.

    Şirkət həmçinin “HAC” kodlu orijinal Switch modelləri ilə bağlı oxşar planlardan bəhs etməyib. Bu da Nintendo-nun diqqətini daha çox yeni nəsil konsol olan Switch 2-yə yönəltdiyini göstərir. Xatırladaq ki, Switch 2 2025-ci ildə təqdim olunub. Konsol daha böyük ekran, artırılmış yaddaş həcmi və əvvəlki nəsillə müqayisədə daha yüksək performans təklif edir.

    Nintendo hələlik yeni versiyanın satış tarixi və qiyməti barədə məlumat verməyib. Şirkət bu ilin may ayında yaddaş komponentlərinin bahalaşması və bazar şərtlərindəki dəyişiklikləri əsas gətirərək Switch 2-nin Avropadakı qiymətini 470 avrodan 500 avroya qaldırmışdı.