Təqdimata hazırlaşan Huawei Watch 5 ağıllı saatının render fotoları təqdim edilib

     Huawei Watch 5 elan edildikdən qısa müddət sonra internetdə bu ağıllı saat modelinə aid insayder görüntülər yayımlanıb. Bu görüntülər cihazın müxtəlif gövdə rənglərindəki görünüşünü detallı şəkildə qiymətləndirməyə imkan verir. Eyni zamanda, gələcək modelin təxmini qiyməti də məlum olub. 91mobiles saytı tərəfindən yayımlanmış renderlərə əsasən, cihaz fırlana bilən klassik tərzdə bir tənzimləyici (qurma başlığı şəklində) və uzunsov formalı fiziki düymə ilə təchiz olunacaq.

     Bu iki elementin arasında isə iki kontaktlı sensor panel yerləşəcək. Hələlik onun dəqiq təyinatı məlum deyil. Bu, həm tibbi sensor, həm də maqnitli enerji yığma sahəsi ola bilər. Saatlar bej, ağ, tünd yaşıl, qəhvəyi, mavi və qara rənglərdə təqdim olunub - həm metal qolbaqlarla, həm də parça və silikon kəmərlərlə birlikdə göstərilib. Görüntülərdəki ekran məzmununa inansaq, bu ağıllı saat fiziki göstəricilərin monitorinqi üçün bütün əsas funksiyaları dəstəkləyəcək. Qeyri-rəsmi məlumatlara görə bu yeni ağllı saatın qiyməti komplektdəki aksesuarın növü və ölçüsündən asılı olaraq 499 avrodan başlayacaq. Ağıllı saatın təqdimatı may ayına planlaşdırılıb.

Mənbə: 91mobiles