Təqdimatdan bir gün öncə Honor Magic V Flip smartfonu Geekbench testlərindən keçib

     Honor şirkəti artıq sabah ilk qatlana bilən qapaqlı smartfonunu təqdim edəcək. Söhbət, Honor Magic V Flip-dən gedir. Təqdimata bir gün qalmış sözügedən smartfonun Geekbench testlərindən keçdiyi məlum olub. Bunun sayəsində Honor Magic V Flip barəsində bəzi təfərrütlar ortaya çıxıb. Beləliklə Geekbench-in məlumatlar bazasına əsasən Honor-un ilk qatlana bilən qapaqlı smartfonu Snapdragon 8+ Gen 1 prosessoru vasitəsilə çalışır. Geekbench testlərindən smartfonun 12 GB RAM-a sahib versiyası keçib. Üstəlik məlum olub ki, Honor Magic V Flip qutudan Android 14-ü əldə edəcək. Smartfon Geekbench-in bir nüvəli testi çərçivəsində 1732 xal, çox nüvəli testi çərçivəsində isə 4431 xal toplayıb. Daha öncəki məlumat sızıntılarına əsasən Honor Magic V Flip smartfonu özündə 50 MP-lik əsas arxa kamera ilə 66 vatt gücündə sürətli şarj texnologiyalı 4600 mAh enerji tutumlu batareyanı birləşdirəcək.