Təqdimatdan öncə Huawei nova Flip smartfonu Geekbench testlərindən keçib

     Huawei artıq bu gün özünün nova smartfon seriyasının ilk qatlana bilən qapaqlı smartfonu nova Flip-i təqdim edəcək. Təqdimatdan öncə məlum olub ki, bu smartfon Geekbench testlərindən keçib. Bunun sayəsində nova Flip barəsində bəzi təfərrüatlar ortaya çıxıb. Beləliklə Geekbench-in məlumatlar bazasına əsasən nova Flip smartfonu Kirin 8000 prosessoru vasitəsilə çalışacaq. Orta səviyyəli olan bu prosessor 8 nüvəlidir.

     O özündə 2.40 GHz tezlikdə çalışan 1 ədəd Cortex-A77 nüvəsini, 2.19 GHz tezlikdə çalışan 3 ədəd Cortex-A77 nüvəsini və 1.84 GHz tezlikdə çalışan 4 ədəd Cortex-A55 nüvəsini birləşdirir. Prosessorun qrafik imkanlarından isə Arm Mali-G610 qrafik çipi cavabdehdir. Geekbench testlərindən Huawei nova Flip-in 12 GB RAM-a sahib versiyası keçib. Smartfon böyük ehtimal ilə HarmonyOS əməliyyat sistemini əldə edəcək. Geekbench sadəcə olaraq onu səhvən Android 12 kimi identifikasiya edib. Beləliklə Huawei nova Flip smartfonu Geekbench-in bir nüvəli testi çərçivəsində 1000 xal, çox nüvəli testi çərçivəsində isə 2419 xal toplayıb.