Tesla Dojo superkompüter layihəsini yenidən işə salır

    Elon Musk bildirib ki, Tesla ötən il dayandırdığı Dojo superkompüter layihəsini yenidən aktivləşdirir. Musk X sosial şəbəkəsində paylaşdığı açıqlamada qeyd edib ki, Dojo3 üzərində işlər Tesla-nın AI5 çip dizaynının artıq yetkin mərhələyə çatmasından sonra bərpa olunur.

    Technote.az “Mashable” platformasına istinadən bildirir ki, Dojo layihəsinin əsas məqsədi Tesla avtomobillərindən toplanan video və sensor məlumatlarını emal edərək Full Self-Driving (FSD) sisteminin neyron şəbəkəsini öyrətməkdir. Lakin ötən il şirkət strategiyasını dəyişərək diqqəti birbaşa avtomobillərin üzərində işləyən süni intellekt çiplərinə yönəltmiş və Dojo komandası buraxılmışdı. Musk həmin dövrdə resursların iki fərqli çip arxitekturasına bölünməsinin səmərəsiz olduğunu bildirmişdi.

    Musk-un sözlərinə görə, AI5 və gələcək AI6 çipləri əsasən avtomobildə real vaxtlı hesablama (inference) üçün nəzərdə tutulub və təlim prosesləri üçün tam optimallaşdırılmayıb. AI6 çiplərinin istehsalı isə Samsung tərəfindən ABŞ-nin Texas ştatındakı zavodda həyata keçiriləcək və tərəflər arasında bu məqsədlə 16 milyard dollarlıq razılaşma imzalanıb.