Texas TP-Link-i Çinə bağlılığı gizlətməkdə ittiham edir

    Technote.az “The Verge” platformasına istinadən bildirir ki, Texas ştatının Baş Prokuroru Ken Paxton məşhur router istehsalçısı TP-Link-ə qarşı məhkəmə iddiası qaldırıb. İddiada bildirilir ki, şirkət Çinlə əlaqələrini gizlədir və müştəriləri çaşdırır.

    İddia ərizəsinə əsasən, TP-Link məhsullarını “Made in Vietnam” kimi təqdim etsə də, istifadə olunan komponentlərin demək olar ki, hamısı Çindən tədarük edilir. Texas tərəfi iddia edir ki, şirkətin istehsal zənciri faktiki olaraq hələ də Çinin daxilində fəaliyyət göstərir və bu, istehlakçılara düzgün məlumat verilməməsi deməkdir. TP-Link 2018-ci ildə Vyetnamda istehsal müəssisəsi açıb, 2024-cü ildə isə qlobal qərargahını ABŞ-də mərkəzləşdirərək TP-Link Systems adlı yeni struktur yaradıb. Lakin Texas prokurorluğu bildirir ki, Vyetnamda edilən son montaj işləri şirkətin Çinlə real bağlılığını gizlətmir.

    Bundan əlavə, Texas tərəfi TP-Link-i məhsullarını “təhlükəsiz” kimi reklam etməkdə də ittiham edir. İddialara görə, cihazlarda təhlükəsizlik zəiflikləri mövcuddur və bu, istehlakçıların aldadılması kimi qiymətləndirilə bilər. Şirkətin Çin hökuməti və ya Çin tərəfindən dəstəklənən kibertəhlükə qrupları ilə potensial əlaqələri də narahatlıq doğurur. Məsələ artıq federal səviyyədə də diqqət mərkəzinə düşüb. Məlumata görə, Federal Trade Commission tərəfindən də araşdırma aparılır.