Trump Mobile-ın ilk telefonu bu həftə satışa çıxır

    Technote.az “The Verge” platformasına istinadən bildirir ki, Donald Trump ilə əlaqəli mobil operator layihəsi olan Trump Mobile-ın “T1 Phone” adlı smartfonu nəhayət satışa çıxmağa hazırlaşır. Şirkətin baş direktoru Pat O’Brien USA Today nəşrinə açıqlamasında bildirib ki, cihaz bu həftədən etibarən sifariş verən istifadəçilərə göndərilməyə başlanacaq.

    T1 Phone ilk dəfə təxminən 11 ay əvvəl təqdim olunsa da, müxtəlif gecikmələr səbəbindən satışa çıxışı dəfələrlə təxirə salınmışdı. Son günlər sosial şəbəkələrdə cihazın ön sifarişlərinin ləğv edilməsi ilə bağlı iddialar yayılmışdı. Trump Mobile rəhbərliyi bu məlumatları dolayı yolla təkzib edib və bütün ön sifarişlərin yaxın həftələrdə çatdırılacağını açıqlayıb. Pat O’Brien gecikmələrin səbəblərini detallı şəkildə izah etməsə də, “Bu gecikmələr bizim üçün buna dəyərdi, çünki nəticədə əla məhsul təqdim edirik” deyə bildirib.

    Şirkət həmçinin cihazın ilk rəsmi promo videosunu da yayımlayıb. Videoda yenilənmiş dizayna sahib telefon və onun qutusu nümayiş olunur. Maraqlıdır ki, cihaz yaxın zamanda həm FCC, həm də PTCRB sertifikatlarından keçib. Bundan əlavə, telefon ötən həftə Google Play sertifikatlı cihazlar siyahısına əlavə olunub ki, bu da Android smartfonlarının satış öncəsi son mərhələlərindən biri hesab olunur.

    Bəzi mediada T1 Phone üçün 600 min ön sifariş verildiyi iddia olunsa da, bu məlumat daha əvvəl təkzib edilmişdi. Trump Mobile rəhbəri dəqiq rəqəm açıqlamasa da, həm mobil xidmətə, həm də T1 Phone modelinə maraqdan “çox məmnun olduqlarını” bildirib.