vivo 7200 mAh batareyalı V80 smartfonunu Hindistanda təqdim etdi

    “vivo” V seriyasının yeni üzvü “vivo V80” smartfonunu Hindistanda təqdim edib. Model 7 200 mAh tutumlu batareyası, nisbətən kompakt 6,59 düymlük ekranı və “Zeiss” dəstəkli 3 arxa kamerası ilə seçilir. Telefon mavi, qara və rəng keçidli olmaqla 3 rəngdə satışa çıxacaq. Modelin digər ölkələrdə satılıb-satılmayacağı hələ açıqlanmayıb.

    “vivo V80” modelinə “Snapdragon 7 Gen 4” prosessoru qoyulub. 6,59 düymlük AMOLED ekranın təsvir ölçüsü Full HD+, yenilənmə tezliyi isə 144 Hz-dir. Bu, animasiyaların və ekranda sürüşdürmənin daha axıcı görünməsi deməkdir. Ekranın parlaqlığı müəyyən şəraitdə 5 000 nitə çata bilir.

    Arxa tərəfdə optik sabitləşdirməli 50 MP “Sony LYT 700V” əsas kamera var. OIS adlanan bu sistem çəkiliş zamanı əl titrəməsinin görüntüyə təsirini azaldır. Bundan başqa, görüntünü keyfiyyət itkisi olmadan 3 dəfə yaxınlaşdıran 50 MP “Sony IMX882” telefoto kamera qoyulub. Kamera sistemini 8 MP ultra genişbucaqlı kamera tamamlayır. Əsas kamera saniyədə 60 kadr sürətlə 4K video çəkir. Ön kameranın ölçüsü 50 MP-dir və avtofokusu var.

    Smartfonun batareyası 90 Vt gücündə naqilli sürətli şarjı dəstəkləyir. “vivo V80” qutudan “Android 17” əsaslı “OriginOS 7” əməliyyat sistemi ilə çıxan ilk modellərdən biridir. Telefonda ekranaltı barmaq izi skaneri, eSIM, NFC və Bluetooth 5.4 var. GPS və 2 diapazonlu Wi-Fi da dəstəklənir. IP69 qoruması cihazı yüksək səviyyədə toz və sudan qoruyur.

    “vivo V80” alüminium çərçivəli və şüşə arxa panellidir. Gövdəsinin qalınlığı 7,79 mm, çəkisi 210 qramdır. Başlanğıc versiyada 8 GB RAM və 128 GB daxili yaddaş var. Bu modelin qiyməti 62 999 Hindistan rupisindən başlayır. 256 GB yaddaşlı variant 69 999 Hindistan rupisinə satılacaq. 512 GB yaddaşlı versiyanın qiyməti 79 999 Hindistan rupisi olacaq.