Vivo Vision qarışıq reallıq cihazı təqdim edilib

     Vivo özünün Vision adlı ilk qarışıq reallıq (MR) cihazını təqdim edib. Cihazın çəkisi cəmi 398 qramdır və olduqca yüngüldür. Müqayisə üçün, Apple Vision Pro-nun çəkisi 600 qramdan çoxdur. Bu, komponentlərin maqnezium ərintisindən hazırlanmış ayrı konstruksiya sayəsində mümkün olub ki, bu da yalnız az çəki deyil, həm də yüksək möhkəmlik təmin edir. Vivo Vision kompakt ölçülərə malikdir: cihazın hündürlüyü 83 mm, qalınlığı isə 40 mm-dir. Rahat istifadə üçün tənzimlənən üz maskaları, yumşaq qulaq yastıqları və asan tənzimləmə üçün iki halqalı tez çıxarılan kəmər nəzərdə tutulub. Batareyanın tutumu barədə Vivo dəqiq məlumat verməyib, yalnız yüksək enerji sıxlığına malik qabaqcıl batareyadan istifadə olunduğunu və bir dəfə şarj olunmaqla uzunmüddətli istifadə təmin etdiyini qeyd edib.

     Vivo Vision hər biri 3840x3552 piksel keyfiyyətli 2 ədəd Micro-OLED ekranla təchiz olunub. İstehsalçının sözlərinə görə, cihaz 36 metrlik diaqonala sahib virtual ekran təklif edir. Eynək taxan istifadəçilər üçün maqnitlə bərkidilən optik linzalar nəzərdə tutulub. Qeyd edək ki, Apple Vision Pro hər göz üçün bir qədər aşağı diaqonal təklif edir: 3660x3200 piksel. Vivo Vision cihazı Snapdragon XR2+ prosessoru vasitəsilə çalışır. Cihaz OriginOS Vision adlı xüsusi hazırlanmış interfeysdən istifadə edir və bu, filmləri immersiv effektlə izləməyi, idman oyunlarının məkan əsaslı təkrarlarını və məhsuldar iş üçün çoxpəncərəli rejimi dəstəkləyir. Vivo Vision keçidli baxış (passthrough) funksiyasına sahibdir. Tamrəngli videonun göstərilməsində gecikmə cəmi 13 millisaniyə təşkil edir ki, bu da real və virtual aləmlər arasında hamar keçidi təmin edir.

     Cihaz baxış bucağını 1.5 dərəcə dəqiqliklə həyata keçirir və əllərin jestlərini 26 sərbəstlik dərəcəsi və 175 dərəcəyədək şaquli diapazonla tanıyır, bu da cihazı göz və əl hərəkətləri ilə idarə etməyə imkan verir. Şirkət satışa başlamazdan əvvəl cihazı “canlı” şəkildə nümayiş etdirməyi və istifadəçilərə onu sınaqdan keçirməyi qərara alıb. 22 avqustdan etibarən Vivo Pekin və Şençjen də daxil olmaqla Çinin iri şəhərlərində yerləşən 12 rəsmi mağazada demo-stansiyalar açacaq və sonradan onların sayını artıracaq. Şirkət istəyir ki, istifadəçilər əvvəlcə cihazı sınaqdan keçirsinlər, görünür, alınan rəylər əsasında onu təkmilləşdirməyi planlaşdırır və yalnız bundan sonra satışa başlamağı nəzərdə tutur. Vivo Vision-un qiyməti barədə hələlik məlumat yoxdur. Vivo isə qiymətin təxminən 10 000 yuan (təqribən 1395$) və ya daha aşağı ola biləcəyinə işarə edib.