vivo X500 smartfonunda 90 Vt naqilli şarj dəstəyi təsdiqləndi

    “vivo” bu ay “X500” seriyasını təqdim etməyə hazırlaşır. Təqdimatdan əvvəl seriyanın standart modeli “vivo X500” Sinqapurda IMDA, Malayziyada SIRIM və TÜV tərəfindən sertifikatlaşdırılıb. Cihaz sənədlərdə V2619 model nömrəsi ilə qeyd olunub. Əsas diqqətçəkən məqam isə budur: smartfon 90 Vt naqilli şarjı dəstəkləyəcək.

    SIRIM sertifikatı V2619 model nömrəsinin məhz “vivo X500”ə aid olduğunu təsdiqləyir. IMDA-nın məlumatına görə, smartfon 5G, Wi-Fi, Bluetooth və NFC bağlantıları ilə işləyəcək. NFC yaxın məsafədən simsiz əlaqə yaradır və uyğun terminallarda təmassız ödəniş etməyə imkan verir. Sertifikat sənədlərində cihazın digər texniki göstəriciləri açıqlanmayıb.

    Əvvəlki sızıntılara görə, “vivo X500” 1.5K təsvir ölçülü OLED ekranla gələcək. Smartfonda 7500 mAh tutumlu batareyanın və 40 Vt naqilsiz şarj imkanının olacağı da gözlənilir. Lakin bu məlumatlar sertifikat sənədlərində göstərilməyib və “vivo” tərəfindən hələ rəsmi təsdiqlənməyib.

    “vivo” kameralarla bağlı bəzi məlumatları artıq təsdiqləyib. Əsas kamera 50 MP təsvir ölçülü, 1/1.28 düym ölçüsündə “Sony Lytia 828” sensorundan yararlanacaq. Arxa hissədə 50 MP ultra genişbucaqlı kamera da yerləşəcək. Bundan başqa, “Sony Lytia 610” sensorlu 64 MP periskop telekamera olacaq. Bu kamera uzaqdakı obyektləri yaxınlaşdıraraq çəkmək üçün nəzərdə tutulub. Seriyanın dəqiq təqdimat günü hələ açıqlanmayıb.