Hələ yanvar ayında məlum oldu ki, hal hazırda hazırlanan Xiaomi 13 Ultra flaqman smartfonunun kamera göstəriciləri Xiaomi 12S Ultra-nın kamera göstəricilərindən fərqlənəcək. Bununla belə bu fərqliliyin heç də yaxşı tərəfə olacağına zəmanət verilmir. Digital Chat Station ləqəbli məşhur insayder Xiaomi 13 Ultra modelinin köməkçi kamerası barəsində məlumat verib. Qeyd etmək lazımdır ki, Xiaomi 13 Ultra-nın əsas kamerası 1” matrisalı Sony IMX989-dən təşkil ediləcək.

    Lakin insayderin verdiyi məlumata əsasən smartfonun köməkçi kamerası 50 MP-lik olacaq və o, böyük olmayan matrisa (1/2.51”) ilə 0.7 mikrometr ölçülü piksellərə sahib Sony IMX858-dən təşkil ediləcək. Müqayisə üçün qeyd etmək lazımdır ki, Xiaomi 12S Ultra modelinin genişbucaqlı və periskop kameraları daha böyük matrisalı (1/2“) 48 MP-lik Sony IMX586-dan təşkil ediliblər. Digər tərəfdən insayder bildirib ki, Xiaomi şirkəti Xiaomi 13 Ultra-nın Sony IMX858 kamera sensorunda hansısa yeni texnologiyalardan istifadə edəcək. Buna görə də smartfonun köməkçi kamerasının hansı keyfiyyəti sərgiləyəcəyini indidən söyləmək çətindir.