Evan Blass adlı məşhur insayder təqdimata hazırlaşan Xiaomi 13T smartfonunun keyfiyyətli render fotolarını təqdim edib. Render fotolara əsasən Xiaomi 13T smartfonu metal materialdan hazırlanmış gövdə ətrafı çərçivəni əldə edəcək. Bununla yanaşı smartfonun süni dəri ilə əhatə olunmuş arxa panelə sahib versiyası da olacaq. Smartfon özündə 3 ədəd arxa kamera obyektivini birləşdirəcək.

    Arxa kamera sahəsində olan Leica yazısı onu göstərir ki, kamera mövzusunda Xiaomi ilə Leica arasındakı əməkdaşlıq davam edir. Gözləntilərə əsasən Xiaomi 13T 50 MP-lik əsas arxa kamera ilə təchiz olunacaq. Digər texniki göstəricilərə gəldikdə isə smartfonun 144 Hz-lik təsvir yenilənməsinə sahib 6.67 düym AMOLED ekran, MediaTek Dimensity 8200 Ultra prosessoru və 67 vatt gücündə sürətli şarj texnologiyalı 5000 mAh enerji tutumlu batareya ilə təchiz olunacağı gözlənilir.