Xiaomi 15 Ultra 2025-ci ilin ən yaxşı kamera smartfonu olmağa iddialıdır

     Technote.az CNET platformasına istinadən bildirir ki, Xiaomi 15 Ultra smartfonu ilə bağlı yeni məlumatlar ortaya çıxıb. Bu cihazın 2025-ci ildə ən yaxşı kamera smartfonlarından biri olacağı gözlənilir. Xiaomi 15 Ultra-nın əsas kamerası 50 MP sensorla təchiz ediləcək və f/1.6 diafraqma ilə 23 mm fokus məsafəsinə sahib olacaq. Bu, az işıqlı şəraitdə belə dəqiq və aydın şəkillər çəkməyə imkan verəcək. Ultra geniş bucaqlı sensor da 50 MP-lik olacaq və ISOCELL JN5 kamera sensorundan istifadə edəcək, bu da geniş bucaqlı çəkilişlərdə keyfiyyətin itirilməməsini təmin edəcək.

     Ən diqqətçəkən xüsusiyyət isə 200 MP-lik və 4.3 qat optik zoom qabiliyyətinə malik periskop tipli telekamera lensdir. Bu lens 100 mm fokus məsafəsinə sahib olacaq və uzaq məsafələrdən detalları itirmədən çəkiliş etməyə imkan verəcək. Bundan əlavə, cihaza Sony IMX858 telekamera sensoru da inteqrasiya olunacaq ki, bu da peşəkar səviyyədə detallı şəkillər çəkməyə kömək edəcək. Sızdırılan məlumatlara görə, Xiaomi 15 Ultra-nın kamera modulu böyük ölçüdə olacaq. Bu öz növbəsində yüksək keyfiyyətli optik komponentlərin yerləşdirilməsi üçün zəruridir.

     Qeyd etmək lazımdır ki, cihaz 6.7 düym ölçülü OLED LTPO ekranla təchiz edilməli və 120 Hz-lik təsvir yenilənməsi tezliyinə sahib olmalıdır. Ekranın küncləri mikro-əyriliyə malik olacaq. Ekrana inteqrasiya olunmuş ultrasəs texnologiyası əsaslı barmaq izi skanı da sürətli və təhlükəsiz kilid açma imkanı təmin edəcək. Xiaomi 15 Ultra ən son Snapdragon 8 Elite prosessoru ilə təchiz ediləcək və bu, yüksək qrafik tələbatlı oyunlardan tutmuş video redaktə tətbiqlərinə qədər hər cür tapşırığın öhdəsindən asanlıqla gələcək. Cihaz 6000 mAh-lıq batareya ilə təchiz ediləcək və 90 vatt gücündə sürətli şarj texnologiyasının və 80 vatt gücündə sürətli naqilsiz şarj texnologiyasını dəstəkləyəcək.