Xiaomi 17T Pro təqdim edildi: 7000 mAh batareya, Dimensity 9500 və Leica kamerası ilə iddialı T modeli

    Xiaomi ənənəvi T seriyasının yeni modelləri olan Xiaomi 17T və Xiaomi 17T Pro smartfonlarını təqdim edib. Bu il şirkət nömrələmə strategiyasında dəyişiklik edərək birbaşa 15 seriyasından 17 seriyasına keçid edib. Buna görə də nə Xiaomi 16, nə də Xiaomi 16T seriyası təqdim olunub. Yeni seriyanın ən iddialı modeli isə Xiaomi 17T Pro-dur.

    Xiaomi T Pro seriyası uzun müddətdir ki, flaqman performansını daha münasib qiymət seqmentinə gətirmək fəlsəfəsi ilə seçilir. Xiaomi 17T Pro da bu yanaşmanı davam etdirir. Cihaz tam flaqman seriyası hesab olunmasa da, ekran, prosessor, batareya, kamera və enerji yığma tərəfində flaqmanlara yaxın imkanlar təklif edir. Bu baxımdan Xiaomi 17T Pro orta-üst seqmentdə ən iddialı modellərdən biri kimi bazara çıxır.

    Xiaomi 17T Pro dizayn baxımından əvvəlki T seriyasının ümumi xəttini qoruyur. Smartfonda köklü görünüş dəyişikliyi olmasa da, bəzi detallarda yenilənmələr var. Cihazın çəkisi 220 qram ətrafında qalır, qalınlığı isə təxminən 8.3 mm-dir. Bu göstəricilər Xiaomi 17T Pro-nun yüngül smartfon olmadığını göstərir. Lakin böyük batareya, metal çərçivə və güclü kamera sistemi nəzərə alındıqda bu çəki gözləniləndir.

    Smartfonun kənarları alüminiumdan hazırlanıb və cihaz IP68 sertifikatı ilə suya və toza qarşı qorunur. Bu, T seriyası üçün vacib üstünlükdür. Çünki Xiaomi 17T Pro flaqman sinfində yer almasa da, istifadəçiyə gövdə keyfiyyəti və qoruma baxımından yüksək səviyyəli təcrübə təqdim etməyə çalışır.

    Ön tərəfdə əsas dəyişikliklərdən biri ekran çərçivələrinin incəldilməsidir. Xiaomi-nin məlumatlarına görə, çərçivələr 1.29 mm səviyyəsinə qədər endirilib. Bu isə cihazın ön paneldən daha müasir görünməsinə səbəb olur. Kamera adası isə T seriyasının tanınan dizayn elementlərindən biri kimi qorunub saxlanılıb.

    Ümumilikdə Xiaomi 17T Pro dizayn baxımından inqilabi dəyişiklik gətirmir. Lakin daha incə çərçivələr, alüminium gövdə, IP68 qoruma və premium hiss verən materiallar cihazı flaqmanlardan çox da geri qalmayan modelə çevirir.

    Xiaomi 17T Pro 6.83 düymlük AMOLED ekranla təchiz olunub. Ekranın ölçüsü Xiaomi 15T Pro ilə müqayisədə ciddi fərq yaratmır. Buna görə də əvvəlki modeldən keçid edən istifadəçilər ölçü baxımından böyük dəyişiklik hiss etməyəcəklər.

    Panel 144 Hz yenilənmə tezliyini dəstəkləyir. Bu göstərici xüsusilə oyun oynayan istifadəçilər üçün cəlbedici görünür. Yüksək yenilənmə tezliyi interfeysdə daha axıcı animasiyalar, oyunlarda isə daha hamar görüntü təcrübəsi yaradır. Ekranın pik parlaqlığı 3500 nitə qədər yüksəlir. Bu göstərici xüsusilə açıq havada və HDR məzmun izləyərkən panelin daha oxunaqlı qalmasına kömək edir.

    Bu il ekranın əsas vurğulanan tərəflərindən biri Xiaomi Vision Care texnologiyasıdır. Bu sistem mavi işığı 75%-ə qədər azalda bilir və ekran parametrlərini istifadəçinin olduğu işıqlandırma mühitinə görə avtomatik tənzimləyir. Yəni ekran rəngləri, parlaqlığı, rəng tonu və mavi işıq balansını şəraitə uyğun dəyişir. İstifadəçinin bu ayarları əl ilə dəyişməsinə ehtiyac qalmır.

    Xiaomi 17T Pro göz rahatlığı istiqamətində TÜV Rheinland-dan bir neçə sertifikat alıb. Bu da cihazın ekranında əsas hədəfin yalnız yüksək parlaqlıq və sürət deyil, həm də gözlərin qorunması olduğunu göstərir.

    Bununla belə, panel LTPO tipli deyil. Yəni ekran yenilənmə tezliyini 1 Hz səviyyəsinə qədər endirə bilmir. Yenilənmə tezliyi məzmuna uyğun olaraq əsasən 60 Hz, 90 Hz, 120 Hz və 144 Hz aralığında tənzimlənir. Bu, gündəlik istifadə üçün yetərli olsa da, tam LTPO panel enerji səmərəliliyi baxımından daha yaxşı nəticə verə bilərdi.

    Xiaomi 17T Pro-nun ən ciddi yeniliklərindən biri batareyadır. Ötən ilki Xiaomi 15T Pro 5500 mAh batareya ilə təqdim olunmuşdu. Yeni modeldə isə tutum silikon-karbon texnologiyası hesabına 7000 mAh-a qaldırılıb. Bu, 1500 mAh-lıq ciddi artım deməkdir.

    Maraqlı tərəf odur ki, batareya tutumu bu qədər artsa da, gövdə qalınlığı minimal səviyyədə dəyişib. Xiaomi bu artımı cəmi 0.4 mm-lik qalınlıq fərqi ilə əldə edib. Bu da silikon-karbon batareya texnologiyasının smartfon bazarında nə qədər vacib yeniliyə çevrildiyini göstərir.

    7000 mAh batareya Xiaomi 17T Pro-nun rəqibləri qarşısında ən böyük üstünlüklərindən biridir. Normal istifadə zamanı cihazın gün sonunu rahat tamamlaması, daha yüngül istifadə ssenarilərində isə gün yarım işləməsi gözlənilir.

    Enerji yığma tərəfində də Xiaomi aqressiv yanaşmanı davam etdirir. Smartfon 100W naqilli və 50W naqilsiz enerji yığmanı dəstəkləyir. Böyük batareyaya sahib cihaz üçün sürətli enerji yığma vacibdir. Rəsmi göstəricilərə əsasən, Xiaomi 17T Pro 21 dəqiqə ərzində batareyanın təxminən yarısını doldura bilir. Bu, gündəlik istifadə üçün ciddi rahatlıq yaradır.

    Xiaomi 17T Pro MediaTek-in flaqman səviyyəli Dimensity 9500 prosessorundan güc alır. Bu çip 3 nanometrlik arxitektura üzərində qurulub və ötən ilki Dimensity 9400+ ilə müqayisədə ciddi performans artımı vəd edir.

    Xiaomi-nin təqdim etdiyi göstəricilərə əsasən, yeni prosessor tək nüvəli performansda 32%, qrafik emal tərəfində 33%, süni intellekt əməliyyatlarında isə 111% daha güclü nəticə verir. Bu da Xiaomi 15T Pro ilə müqayisədə nəzərəçarpan performans artımı deməkdir.

    Smartfonda yenilənmiş 3D IceLoop soyutma sistemi də istifadə olunur. Bu sistem istiliyi daha yaxşı paylamağa və uzunmüddətli yüklənmə zamanı performansı daha stabil saxlamağa hesablanıb. Xüsusilə oyun oynayan, uzun müddət kamera istifadə edən və yüksək performans tələb edən tətbiqlərlə işləyən istifadəçilər üçün bu vacib detaldır.

    Yaddaş tərəfində Xiaomi 17T Pro 12 GB RAM ilə gəlir. Daxili yaddaş seçimləri isə 256 GB və 512 GB-dır. Yaddaş UFS 4.1 standartındadır. Bu isə daha yüksək oxuma və yazma sürəti deməkdir. Başqa sözlə, tətbiqlərin açılması, faylların köçürülməsi, oyunların yüklənməsi və video emalı zamanı yaddaş sürəti cihazın ümumi performansına müsbət təsir göstərir.

    Smartfon 2 fiziki SIM və eSIM dəstəyi ilə gəlir. MicroSD kart dəstəyi isə yoxdur. Bu artıq müasir flaqman və orta-üst seqment smartfonlarda geniş yayılmış yanaşmadır. Buna görə də cihazı alarkən yaddaş seçimini əvvəlcədən düzgün etmək vacibdir.

    Xiaomi 17T Pro kamera tərəfində də iddialı modeldir. Smartfon üçlü kamera sistemi ilə gəlir. Burada 50 MP əsas kamera, 50 MP periskop telefoto kamera və 12 MP ultra geniş bucaqlı kamera yerləşir. Xiaomi-nin Leica ilə əməkdaşlığı bu modeldə də davam edir.

    Əsas kamera Light Fusion 950 sensoru ilə təchiz olunub. Ötən ilki Xiaomi 15T Pro-da Light Fusion 900 istifadə olunurdu. Yəni bu il əsas kamerada sensor yenilənməsi var. Meqapiksel göstəricisi dəyişməsə də, yeni sensor və prosessorun görüntü emal imkanları nəticəsində foto keyfiyyətində təkmilləşmə gözlənilir.

    Əsas kamera f/1.67 diafraqma, OIS və PDAF avtofokus dəstəyi ilə gəlir. Gündüz, portret və gecə çəkimlərində cihaz flaqmana yaxın nəticə təqdim etməyə hesablanıb. Böyük sensor, aşağı diafraqma dəyəri və Leica rəng emalı fotolara daha canlı, kontrastlı və sosial şəbəkələr üçün hazır görünüş verir.

    Leica effektləri Xiaomi 17T Pro-nun kamera təcrübəsində əsas rol oynayır. Bu effektlər fotolara xüsusi rəng xarakteri, canlılıq və fərqli atmosfer qatır. Xüsusilə sosial mediada paylaşılacaq görüntülər üçün bu yanaşma istifadəçilərin xoşuna gələ bilər.

    Telefoto kamera isə cihazın ən maraqlı hissələrindən biridir. 50 MP periskop telefoto kamera 5x optik yaxınlaşdırma təklif edir. Kamera OIS və avtofokus dəstəyinə sahibdir. Bundan əlavə, 30 sm məsafədən yüksək keyfiyyətli makro çəkimlər də edə bilir.

    Süni intellekt dəstəyi ilə 10x rəqəmsal yaxınlaşdırmada da daha detallı və istifadəyə yararlı fotolar əldə etmək mümkündür. Əlbəttə, yüksək rəqəmsal zoom göstəriciləri daha çox xüsusi vəziyyətlər üçün nəzərdə tutulur. Real istifadədə isə 5x və 10x aralığı daha praktik nəticə verir.

    Portret çəkimlərdə telefoto kamera daha təbii perspektiv, daha yumşaq arxa fon ayrımı və daha professional görünüş yaradır. Xiaomi bu kamera üçün Stage Mode kimi səhnə və konsert çəkimlərinə uyğun rejimlər də təqdim edir.

    Xiaomi 17T Pro video tərəfində də güclü göstəricilərə sahibdir. Əsas kamera 8K 30 FPS və 4K 120 FPS video çəkə bilir. Əsas və telefoto kameralar 4K 60 FPS video dəstəyi təqdim edir. Bu, yüksək keyfiyyətli məzmun yaratmaq istəyən istifadəçilər üçün vacib üstünlükdür.

    Bununla belə, video tərəfində iPhone hələ də sabitlik, kamera keçidləri, dinamik aralıq və işıq dəyişikliklərinə uyğunlaşma baxımından çox güclü rəqib olaraq qalır. Xiaomi 17T Pro foto tərəfində daha iddialı görünür. Video imkanları yüksək olsa da, ümumi sabitlik və rəng ardıcıllığı baxımından iPhone səviyyəsinə çatmaq hələ də çətin məsələdir.

    Xiaomi 17T Pro-da 12 MP ultra geniş bucaqlı kamera və 32 MP selfi kamerası istifadə olunur. Bu kameralar Xiaomi 15T Pro ilə müqayisədə əsaslı şəkildə dəyişməyib.

    Ultra geniş bucaqlı kamera gündüz çəkimlərində və mənzərə fotolarında işə yarayır. Leica rəng emalı bu kameranın nəticələrini müəyyən qədər daha cəlbedici göstərir. Lakin aşağı işıqda kənarlarda detal itkisi və görüntü keyfiyyətində zəifləmə müşahidə oluna bilər. Bu baxımdan ultra geniş kamera əsas və telefoto kameraların səviyyəsinə çatmır.

    32 MP selfi kamerası isə geniş bucaqlı çəkimlər üçün uyğundur. Ümumi keyfiyyət seqment üçün yaxşıdır. Lakin ön kamerada 4K 60 FPS video dəstəyinin olmaması tənqid edilə biləcək məqamlardan biridir. Ön kamera maksimum 4K 30 FPS video qeydi aparır.

    Xiaomi 17T Pro-da təqdimatda ən çox vurğulanan funksiyalardan biri “Canlı anlar” xüsusiyyəti olub. Bu funksiya iPhone-lardan tanış olan Live Photos məntiqinə bənzəyir. Foto çəkilən zaman həmin anın qısa animasiyası da qeydə alınır.

    Maraqlı tərəf odur ki, bu xüsusiyyət arxada yerləşən hər üç kamera ilə işləyir. Beləliklə, istifadəçi yalnız statik foto deyil, həmin anı qısa hərəkətli xatirə kimi yadda saxlaya bilir. Bu funksiya hər istifadəçi üçün vacib olmaya bilər, lakin fotolarını daha çox canlı an formatında saxlamağı sevənlər üçün maraqlı əlavədir.

    Xiaomi 17T Pro qutusundan Android 16 ilə çıxır. Cihazın qutusunda uyğun güclü adapter başlığı, qoruyucu keys və USB kabelin olması da müsbət məqamdır.

    Xiaomi yenilənmə müddəti ilə bağlı hər zaman rəqibləri qədər aydın və sürətli mövqe ortaya qoymur. Bu baxımdan şirkətin sistem yenilənmələrində daha çevik davranması istifadəçi təcrübəsi üçün vacib olardı. Xüsusilə bu səviyyədə smartfon alan istifadəçilər uzunmüddətli və vaxtında yenilənmə dəstəyi gözləyirlər.

    Xiaomi 17T Pro dizayn, ekran, batareya, performans və kamera baxımından balanslı smartfon kimi çıxış edir. Cihaz tam flaqman seriyasına aid olmasa da, bir çox xüsusiyyəti ilə flaqman səviyyəsinə yaxınlaşır. 7000 mAh batareya, 100W naqilli və 50W naqilsiz enerji yığma, Dimensity 9500 prosessoru, 144 Hz AMOLED ekran, Leica kamera sistemi və 5x telefoto lens modeli rəqibləri qarşısında güclü mövqeyə çıxarır.

    Ən böyük üstünlüklər batareya, performans və telefoto kamera tərəfində görünür. Xüsusilə Xiaomi 15T Pro ilə müqayisədə batareyanın 5500 mAh-dan 7000 mAh-a yüksəlməsi ciddi yenilikdir. Dimensity 9500 prosessoru da cihazı həm gündəlik istifadə, həm də oyun və ağır tətbiqlər üçün daha güclü edir.

    Bununla belə, bəzi məqamlar daha yaxşı ola bilərdi. Ön kamerada 4K 60 FPS video dəstəyinin olmaması, ultra geniş bucaqlı kameranın əsas və telefoto kamera qədər güclü olmaması, video tərəfdə iPhone qədər sabit nəticə verməməsi və uzunmüddətli sistem yenilənmə siyasətinin daha aydın olmaması cihazın əsas tənqid edilə biləcək tərəfləridir.

    Ümumilikdə Xiaomi 17T Pro flaqmandan bir pillə aşağı, lakin flaqmana çox yaxın təcrübə təklif edən smartfondur. Xiaomi burada minimal kəsintilər etməklə daha geniş istifadəçi qrupuna xitab edən model hazırlayıb. Əgər istifadəçi üçün böyük batareya, güclü performans, Leica kamera sistemi və sürətli enerji yığma əsas prioritetdirsə, Xiaomi 17T Pro bu ilin ən maraqlı T seriyası modellərindən biri hesab oluna bilər.