Xiaomi 18 Pro smartfonu AI ilə arxa ekran tətbiqi yaratmağa imkan verəcək

    “Xiaomi” gələcək “Xiaomi 18 Pro” seriyasının arxa ekranında işləyəcək yeni funksiyaları göstərib. İstifadəçilər süni intellektin köməyi ilə konkret tapşırıqlar üçün sadə tətbiqlər hazırlayıb həmin ekranda işlədə biləcəklər. Şirkət funksiyanı “Weibo”da yayımladığı qısa videoda nümayiş etdirib. Beləliklə, arxa ekran yalnız hazır vidjetlərlə məhdudlaşmayacaq.

    Videoda su içməyi xatırladan alət, yumurta bişirmək üçün taymer, resept tövsiyələri və yeni ingilis sözlərini öyrədən tətbiqlər göstərilib. İstifadəçi ehtiyacına uyğun belə kiçik alətlər hazırlaya biləcək. Əvvəlki “Xiaomi 17 Pro” seriyasının arxa ekranında yalnız seçilmiş vidjetlər və əvvəlcədən quraşdırılmış tətbiq kartları işləyirdi. Yeni sistemdə hazır seçimlərlə kifayətlənmək lazım olmayacaq.

    “Xiaomi” Çindəki bir neçə brendlə əməkdaşlığa başlayıb. Tərəfdaş brendlər “Xiaomi 18 Pro” seriyasının arxa ekranı üçün xüsusi tətbiq kartları hazırlayacaqlar. İstifadəçilər həm süni intellektlə yaratdıqları alətlərdən, həm də hazır kartlardan yararlana biləcəklər. Tərəfdaşların adları və kartların tam siyahısı hələ açıqlanmayıb.

    “Xiaomi 18 Pro” və “Xiaomi 18 Pro Max” modelləri sentyabrın sonlarında Çində təqdim olunacaq. Telefonlara hələ rəsmi elan edilməyən “Snapdragon 8 Elite Gen 6 Pro” prosessorunun qoyulacağı gözlənilir. “Qualcomm”un istehsal edəcəyi deyilən bu çiplə bağlı məlumat hələlik şayiədir. “Xiaomi” yenilənmiş arxa ekranın ilk görüntülərini daha əvvəl də göstərmişdi.