Xiaomi şirkəti CIVI 3 smartfonu barəsində müxtəlif məlumatları özlərində birləşdirən tizer posterləri təqdim etməyə davam edir. Bu dəfə Çinin Weibo adlı sosial şəbəkəsində şirkət tərəfindən təqdim edilmiş yeni tizer posterlərində CIVI 3-ün ön paneli əks olunub. Posterlərdən də görmək olar ki, smartfon ikili ön kameraya sahib olacaq və ön kameralar ekranın yuxarı mərkəz hissəsində yerləşəcək oval formalı çıxıntı daxilində olacaqlar.

    Sözügedən oval formalı çıxıntı hissə bir növ iPhone 14 Pro modellərinin ekranlarında reallaşdırılmış Dynamic Island çıxıntısını xatırladır. Məlumatda həmçinin qeyd edilib ki, CIVI 3-ün hər iki ön kamerası 32 MP-lik olacaq və onlar 4K keyfiyyətində videolar çəkə biləcəklər. Birinci kamera 78 dərəcə bucaq əhatəsini, ikinci kamera isə 100 dərəcə bucaq əhatəsini təmin edəcək. Qeyd etmək lazımdır ki, CIVI 3 smartfonu MediaTek Dimensity 8200 Ultra prosessoru vasitəsilə çalışacaq. Smartfonun təqdimatı 25 may tarixində baş tutacaq.