Xiaomi ilk klips formalı simsiz qulaqlığını qlobal satışa hazırlayır

    “Xiaomi” klips formasında hazırladığı ilk simsiz qulaqlığı “Xiaomi Clip”i qlobal bazara çıxarmağa hazırlaşır. Model Çində 6 aydır satılır. İndi qulaqlıq şirkətin qlobal internet mağazasına da əlavə olunub. Bu, “Xiaomi Clip”in başqa ölkələrdə satışa çıxacağını göstərsə də, dəqiq tarix hələ açıqlanmayıb.

    “Xiaomi Clip” qulağın ətrafına keçən C formalı quruluşdadır və görünüşü zinət əşyasını xatırladır. Qulağı tam bağlamayan bu model “Xiaomi”nin belə dizaynda hazırladığı ilk qulaqlıqdır. Hər qulaqlıq təxminən 5,5 qramdır. Səsi 11 mm ölçülü dinamiklər verir. “Sony” və “Samsung” kimi şirkətlər də son vaxtlar bu tip modellərə yönəlir.

    Qulaqlıqlar bir dolumla maksimum 9 saat işləyə bilir. Modeldə ANC, yəni ətrafdakı səsləri aktiv şəkildə azaltmaq funksiyası yoxdur. Bunun batareyanın daha uzun işləməsinə kömək etdiyi deyilir. Yüksək keyfiyyətli simsiz səs ötürmək üçün LHDC kodeki dəstəklənir. IP57 qoruması sayəsində “Xiaomi Clip” 1 metrədək dərinlikdə suya qısa müddət tab gətirə bilir.

    Model bir neçə rəngdə hazırlanıb. Onların arasında ən çox diqqət çəkən metal görünüşlü qızılı versiyadır. Dizaynı “Huawei FreeClip”i xatırladır. “Xiaomi” qlobal qiyməti və satış tarixini hələ açıqlamayıb. Şirkət bu məlumatları noyabrın 17-də keçirəcəyi tədbirdə paylaşa bilər, ancaq bununla bağlı rəsmi təsdiq yoxdur.