Xiaomi MIX Flip-in qlobal versiyası təqdim edilib - QİYMƏTİ

     Xiaomi şirkəti iyul ayında Çində təqdim etmiş olduğu ilk qatlana bilən qapaqlı smartfonu Xiaomi MIX Flip-i qlobal bazarda təqdim edib. Smartfonun qlobal versiyası texniki özəlliklər baxımından Çində satılan versiyadan heç də fərqlənmir. Sadəcə olaraq Xiaomi MIX Flip-in qlobal versiyası yalnız bir variantda təqdim edilib. Söhbət, 12 GB RAM-a və 512 GB daxili yaddaş həcminə sahib versiyadan gedir. Digər texniki özəlliklərə gəldikdə isə Xiaomi MIX Flip 120 Hz-lik təsvir yenilənməsinə sahib 2912x1224 piksel keyfiyyətli 6.86 düym ölçülü daxili OLED ekranla və 120 Hz-lik təsvir yenilənməsinə sahib 1392x1208 piksel keyfiyyətli 4.01 düym ölçülü xarici OLED ekranla təchiz olunub.

     Xiaomi MIX Flip Snapdragon 8 Gen 3 prosessoru vasitəsilə çalışır və özündə 50 MP (f/1.7 diafraqma, avtofokus, optik stabilizasiya) + 50 MP (f/2.0 diafraqma, avtofokus, 2 qat optik zoom, optik stabilizasiya) ikili arxa kamera ilə 32 MP-lik ön kameranı birləşdirir. Batareyaya gəldikdə isə Xiaomi MIX Flip 67 vatt gücündə sürətli şarj texnologiyalı 4780 mAh enerji tutumlu batareya ilə təchiz olunub. Xiaomi MIX Flip-in qlobal versiyası artıq satışa çıxıb. Onun qiyməti isə 1300 avro təşkil edir