Yeni iPhone 17e nə təklif edəcək?

    Technote.az “Apple Insider” platformasına istinadən bildirir ki, Apple-ın təqdim etməyə hazırlaşdığı iPhone 17e modeli ilə bağlı yeni sızıntılar yayılıb. Məlumata görə, cihazın dizayn və ekran xüsusiyyətlərində ciddi dəyişiklik gözlənilmir.

    Çin sosial şəbəkəsi Weibo-da paylaşılan məlumata əsasən, tanınmış mənbə Digital Chat Station bildirir ki, iPhone 17e ekran baxımından iPhone 16e ilə demək olar ki, eyni olacaq. Smartfon 6,1 düymlük OLED panel, 60 Hz yenilənmə tezliyi ilə təqdim ediləcək. Bu isə o deməkdir ki, cihaz ProMotion və Always-On Display funksiyalarını dəstəkləməyəcək. Ən nəzərəçarpan yenilik isə Dynamic Island olacaq. Xatırladaq ki, Apple bu dizaynı hələ 2022-ci ildə təqdim etsə də, iPhone 16e modelində hələ də klassik “notch” dizaynından istifadə olunurdu. Yeni modeldə isə Face ID sensorları artıq Dynamic Island daxilində yerləşəcək.

    Texniki tərəfdə iPhone 17e Apple A19 prosessoru ilə təchiz ediləcək. Bu çip iPhone 17 seriyasında istifadə olunur və əvvəlki nəsil ilə müqayisədə daha yüksək performans vəd edir. Geekbench 6 Metal testlərinə görə, iPhone 17 modeli 37 014 bal topladığı halda, iPhone 16e bu testdə 22 478 bal nəticə göstərib. Bununla belə, real istifadə zamanı 60 Hz ekran səbəbindən performans artımı hər kəs üçün hiss olunmaya bilər.

    Sızıntıda istifadəçilərin çoxdan gözlədiyi başqa bir mövzuya, MagSafe dəstəyinə isə toxunulmur. Hələlik iPhone 17e-də bu funksiyanın olub-olmayacağı ilə bağlı rəsmi və ya qeyri-rəsmi təsdiq yoxdur. Qeyd edək ki, Digital Chat Station-ın Apple ilə bağlı sızıntıları bəzən dəqiq çıxsa da, etibarlılığı sabit hesab edilmir. Buna baxmayaraq, iPhone 17e-nin 2026-cı ilin fevralında təqdim olunacağı gözlənilir.