OnePlus şirkəti yeni flaqman smartfonu olan OnePlus 10T-ni təqdim edib. Bu smartfon flaqman smartfonlar sırasına daxil olsa da şirkət onun bəzi özəlliklərini əvvəlki flaqman smartfonlarından fərqli olaraq bir qədər sadələşdirib. Buna bamayaraq bəzi göstəricilər baxımından o yenə də daha öncə təqdim edilmiş OnePlus 10 Pro-nu geridə qoyur. Beləliklə OnePlus 10T modeli 120 Hz-lik təsvir yenilənməsinə sahib Full HD+ keyfiyyətli 6.7 düym AMOLED ekran ilə təchiz olunub. Ekranın yuxarı mərkəz hissəsində ön  kamera üçün nəzərdə tutulmuş kiçik dairəvi çıxıntı yerləşdirilib.

    Barmaq izi skanı texnologiyası da həmçinin birbaşa ekrana inteqrasiya edilib. Smartfon özündə kontaktsız ödənişlər üçün nəzərdə tutulmuş NFC çipi və stereo səsgücləndiriciləri birləşdirir. OnePlus 10 Pro-dan fərqli olaraq yeni smartfonun ekranının kənar hissələri bir qədər əyilmiş dizayndan məhrum olublar. Bundan əlavə olaraq OnePlus 10T-də smartfonun səssiz rejimə keçirilməsi üçün nəzərdə tutulmuş ayrıca düymə də rellaşdırılmayıb. Şirkətin verdiyi məlumata əsasən bu cür düymə smartfon gövdəsində çox yer tutur.

    Əsas texniki göstəricilər baxımından OnePlus 10T modeli 8 nüvəli Snadragon 8+ Gen 1 prosessoru, 8/12/16 GB RAM, 128/256 GB daxili yaddaş həcmi (microSD dəstəyi yoxdur), 50 MP (f/1.8 diafraqma, optik stabilizasiya) + 8 MP (f/2.2 diafraqma, 120 dərəcə bucaq əhatəsi, fikslənmiş fokus) + 2 MP (f/2.4 diafraqma, 2-4 sm fokus məsafəsi) üçlü arxa kamera, 16 MP-lik (f/2.4 diafraqma, fikslənmiş fokus, elektron stabilizasiya) ön kamera və 150 vatt gücündə sürəti şarj texnologiyalı 4800 mAh enerji tutumlu batareya ilə təchiz olunub. Smartfon OxygenOS 12.1 interfeysli Android 12 vasitəsilə çalışır. OnePlus 10T 29 sentyabr tarixində satışa çıxacaq. Çox güman ki, smartfonun 12 GB RAM-a və 256 GB yaddaşa sahib versiyası ABŞ-da və Avropada satılmayacaq. Lakin digər iki modelin qiyməti aşağıdakı kimi olacaq:

- 8 GB RAM + 128 GB yaddaş - 649$

- 16 GB RAM + 256 GB yaddaş - 749$.