Yuxuların vizuallaşdırılması üçün Dream Recorder adlı cihaz təqdim edilib

     Modem Works şirkəti Dream Recorder adlı qeyri-adi bir cihazı təqdim edib. Bu cihaz istifadəçinin danışdığı yuxular əsasında video yaradır. Yeni cihaz yuxu gündəliyi kimi təqdim olunur və video generasiyası funksiyasına malikdir. İstifadəçi yuxudan oyandıqdan sonra yuxusunu təsvir edir və Dream Recorder həmin hekayəni qısa videoya çevirir. Modem Works şirkəti Dream Recorder-i “şüuraltına açılan portal” kimi təqdim edir və cihazın yuxuları interpretasiya edib canlandırmağa imkan verdiyini bildirir.

     Cihaz istifadəçinin danışdığı yuxunun mahiyyətini tutur və sonra uyğun vizualları yaratmaq üçün alqoritmlərdən istifadə edir. Dream Recorder eyni vaxtda 7 fərqli yuxu əsasında hazırlanmış videonu yaddaşda saxlaya bilir. Bu cihazı hazır şəkildə almaq mümkün deyil - onu istifadəçi özü yığmalıdır. Yığmaq üçün Raspberry Pi adlı mikrokompüter, 3D printer və Modem Works tərəfindən təqdim olunan təlimat lazımdır. Bu layihə təkcə texnologiya həvəskarlarını deyil, həm də rəssamları, psixoloqları və özünü müşahidə etməyi sevənləri maraqlandıra bilər. Layihənin mənbə kodu GitHub platformasında yerləşdirilib.