Android Auto və Apple CarPlay arasında hansı fərqlər var?

    Google və Apple-ın smartfon dünyasındakı rəqabəti avtomobillərdə də davam edir. Android Auto və Apple CarPlay sürücülərə telefondakı xəritə, musiqi, mesajlaşma və digər tətbiqlərdən avtomobilin multimedia ekranında istifadə etməyə imkan verir. Hər iki sistem oxşar məqsədə xidmət etsə də, onların imkanları arasında ciddi fərqlər var. Hazırda əsas üstünlük Android Auto-nun daha çox fərdiləşdirmə imkanı və istifadəçiyə verdiyi əlavə seçimlərdir.

    Apple CarPlay əsasən Apple-ın əvvəlcədən müəyyən etdiyi interfeys və istifadə qaydalarına əsaslanır. Android Auto isə istifadəçiyə ekranı daha çox öz istəyinə uyğunlaşdırmağa imkan verir. Android Auto-nun çoxpəncərəli interfeysində xəritə, musiqi və müxtəlif vidcetlərin ekranda necə yerləşəcəyini müəyyənləşdirmək mümkündür. İstifadəçi hansı elementin harada görünəcəyini və ekranda nə qədər yer tutacağını seçə bilir.

    CarPlay-də də tətbiqlərin sırasını dəyişmək, eləcə də xəritə və musiqini eyni anda göstərən bölünmüş ekran rejimindən istifadə etmək mümkündür. Lakin fərdiləşdirmə imkanları Android Auto ilə müqayisədə daha məhduddur. Məsələn, CarPlay üçün yalnız Apple-ın təqdim etdiyi divar kağızlarından istifadə etmək mümkündür. Google isə Android Auto-da telefonun divar kağızının avtomobil ekranında da göstərilməsinə imkan verir.

    Android Auto-nun daha təcrübəli istifadəçilər üçün mühüm üstünlüklərindən biri Developer Settings menyusudur. Bu menyu vasitəsilə sistemin standart olaraq təqdim etmədiyi bəzi parametrləri dəyişmək mümkündür. Məsələn, ekranın görüntü keyfiyyətini əl ilə dəyişmək, gündüz və ya gecə rejimini məcburi aktivləşdirmək, simsiz Android Auto bağlantısını açıb-bağlamaq mümkündür.

    Bundan əlavə, Android-in daha açıq platforma olması rəsmi mağazadan kənar quraşdırılmış bəzi tətbiqlərin istifadəsinə də imkan yaradır. Apple isə CarPlay-də işləyə biləcək tətbiqlərə daha sərt məhdudiyyətlər tətbiq edir. Bu yanaşmanın təhlükəsizlik tərəfi də var: avtomobil ekranında video kimi sürücünün diqqətini yayındıra biləcək funksiyalardan hərəkət zamanı istifadə etmək təhlükəlidir.