Baidu robotaksilərində kütləvi nasazlıq yaşanıb

    Technote.az “The Verge” platformasına istinadən bildirir ki, Baidu-ya məxsus robotaksilər böyük şəhərlərdən birində yollarda qəfil dayanaraq nəqliyyatda ciddi problemlərə səbəb olub. Hadisə nəticəsində bəzi sərnişinlər avtomobillərin içində qalıb, bəzi robotaksilər isə magistral yollarda hərəkəti tam bloklayıb və ən azı bir yol qəzasının baş verdiyi bildirilir.

    Polis bildirib ki, Wuhan şəhərində Baidu-nun Apollo Go robotaksilərinin yolun ortasında dayanması və hərəkət edə bilməməsi ilə bağlı çoxsaylı müraciətlər daxil olub. İlkin araşdırmaya görə, hadisəyə səbəb kimi sistem nasazlığı göstərilir. Xoşbəxtlikdən hadisə zamanı xəsarət alan olmayıb.

    Wuhan şəhəri Baidu-nun robotaksi xidmətinin əsas mərkəzlərindən biridir və şirkətin burada 500-dən çox sürücüsüz avtomobili fəaliyyət göstərir. Yerli mediaya istinadən Reuters xəbər verir ki, nasazlıq ən azı 100 robotaksiyə təsir edib. Baidu isə hadisə ilə bağlı hələlik rəsmi açıqlama verməyib.