BYD 5 dəqiqəyə 70 % dolduran stansiyalar qurur

    BYD Avropa bazarında mövqeyini gücləndirmək üçün yeni nəsil ultra sürətli enerji doldurma şəbəkəsini genişləndirməyə hazırlaşır. Şirkət 2027-ci ilin sonunadək qitə üzrə ümumilikdə 3 min ədəd Flash Charger quraşdırmağı planlaşdırır. BYD artıq Almaniya və Böyük Britaniyada ilk 1500 kVt gücündə enerji doldurma məntəqələrini istifadəyə verib. Bu stansiyalar güc baxımından Tesla-nın 500 kVt-lıq V4 Supercharger sistemlərini xeyli üstələyir. Bununla belə, Tesla hazırda Avropada təxminən 20 min enerji doldurma nöqtəsinə sahibdir və infrastruktur baxımından üstünlüyünü qoruyur.

    Məlumatlara görə, hər bir Flash Charger stansiyasının qurulması təxminən 580 min avroya başa gəlir. Bu isə 3 min stansiyanın ümumi investisiya dəyərinin 2 milyard dollara yaxın olacağı anlamına gəlir. Şirkət bildirir ki, yüksək gücə baxmayaraq, yeni sistem elektrik şəbəkəsinə əlavə yük yaratmayacaq. Çünki enerji əvvəlcədən batareyalarda saxlanılacaq və əsasən gecə saatlarında doldurulacaq. Bu yanaşma pik saatlarda elektrik infrastrukturuna düşən təzyiqi azaltmağa hesablanıb.

    Yeni Flash Charger-lardan standart CCS enerji doldurma girişinə malik bütün elektromobillər istifadə edə biləcək. Lakin maksimum 1500 kVt sürətindən yalnız BYD-nin yeni Blade Battery texnologiyası ilə təchiz edilmiş avtomobillər yararlana biləcək. Hazırda Avropada bu xüsusiyyətə malik yeganə model 115 min avro dəyərində olan Denza Z9 GT-dir. Şirkətin məlumatına görə, bu avtomobil yeni stansiyalarda cəmi 5 dəqiqə ərzində batareyanın 70 faizini doldura bilir. BYD-nin bu addımı Avropada elektromobil bazarında rəqabəti daha da gücləndirə və ultra sürətli enerji doldurma texnologiyalarının yayılmasını sürətləndirə bilər.