BYD-nin yeni satış məsləhətçisi humanoid robot olacaq

    BYD avqust ayında ilk humanoid robotunu təqdim etməyi planlaşdırır. Robot ilkin mərhələdə BYD-nin avtomobil salonlarında müştərilərə xidmət göstərəcək. South China Morning Post-un məlumatına görə, BYD ilk işlək humanoid robot prototipini Çinin Çjençjou şəhərində yerləşən Di Space təcrübə mərkəzində nümayiş etdirəcək. Robot sadəcə konsept olmayacaq və mərkəzə gələn insanlarla birbaşa ünsiyyət qura biləcək. KrASIA-nın BYD-nin sonradan silindiyi bildirilən paylaşımına istinadən yaydığı məlumata görə, robot “Xiao Di” adlanır. Onun boyunun 1,61 metr, çəkisinin isə 58,5 kiloqram olduğu bildirilir. Xiao Di-nin altı Çin dialekti və altı xarici dil arasında real vaxt rejimində tərcümə edə bildiyi də iddia olunur. Lakin BYD hələlik bu texniki göstəriciləri rəsmi şəkildə təsdiqləməyib.

    BYD-nin icraçı vitse-prezidenti Stella Li gələcəkdə şirkətin hər avtomobil salonunda iki və ya üç humanoid robotun olmasını istəyir. Robotlar müştəriləri qarşılayacaq, avtomobillər haqqında məlumat verəcək və satış əməkdaşlarına kömək edəcək. Şirkət onların insan əməkdaşları əvəz etmək üçün deyil, onlara yardım etmək üçün nəzərdə tutulduğunu bildirir.