Avropa Komissiyası son həftələrdə Çindən idxal edilən elektrik avtomobillərinə 38.1 faizədək əlavə gömrük rüsumları tətbiq edib. Bu vəziyyət avtomobil dünyasında böyük əks-səda doğursa da, əlavə vergilərə məruz qalan Avropadakı istehsalçılardan qisas çağırışı gecikməyib. Çin mediasında yer alan xəbərlərə görə, elektrik avtomobil istehsalçıları daxili yanma mühərrikli iri Avropa avtomobilləri üçün 25% əlavə vergi tələb edir. Bildirilir ki, bu çağırış ötən çərşənbə axşamı Pekində keçirilən görüşdə edilib. Görüşdə 6 Avropa və 4 Çin avtomobil istehsalçısının nümayəndələri, eləcə də müxtəlif sənaye və elmi-tədqiqat müəssisələrinin nümayəndələri iştirak ediblər.

     Hesabata görə, 2023-cü ildə Çinə mühərrik həcmi 2.5 litr və daha çox olan 250 minə yaxın avtomobil idxal edilib. Bu rəqəm ötən ilin ümumi bazarının 1%-nə uyğundur. Çindən idxal edilən avtomobillərin Avropadakı payı isə təxminən 3%-dir. Həmçinin bildirilir ki, iclasda Çin nümayəndəsi, Avropa Komissiyasını Çinli elektrik avtomobil istehsalçılarının ticarət sirlərini ələ keçirmək üçün istintaqdan bəhanə kimi istifadə etməkdə ittiham edib. Xatırladaq ki, komissiya əlavə vergilər tətbiq etməzdən əvvəl Çin brendlərinin daha çox dövlət yardımı alıb-almadığını araşdırmaq üçün araşdırma başlatmışdı.

     “Global Times” daha əvvəl Çinin 25% əlavə vergi tətbiq edə biləcəyini bildirmişdi. Belə bir addımın atılıb-atılmayacağı bilinmir, lakin Çin brendləri artıq Avropada istehsal üçün qollarını çırmalayıblar. BYD 2025-ci ildə Macarıstandakı fabrikində istehsala başlamağı planlaşdırır. Leapmotor, Stellantis ilə əməkdaşlıq çərçivəsində Polşada T03 modelinin istehsalına da başlayacaq. "Great Wall Motor"un da Avropada istehsal etmək üçün yer axtardığı bildirilir. Şirkətin Almaniya, Polşa və Macarıstan arasında seçim edəcəyi söylənilir. Chery isə daha əvvəl İspaniyada fabrik quracağını açıqlamışdı.