Flock-un nəhəng mobil müşahidə şəbəkəsi planı sızdırıldı

    ABŞ-də avtomobil nömrələrini avtomatik tanıyan geniş kamera şəbəkəsi ilə tanınan Flock Safety şirkətinin yüz minlərlə Uber, Lyft və çatdırılma avtomobilindən mobil müşahidə vasitəsi kimi istifadə etməyi planlaşdırdığı üzə çıxıb. 404 Media-nın əldə etdiyi sızdırılmış şirkət təqdimatına görə, Flock təxminən 350 min avtomobili öz məlumat toplama şəbəkəsinə qoşmağı nəzərdə tutub. Planın əsas ideyası sürücülərin avtomobillərindəki videoregistratorlardan istifadə edərək küçələrdə qarşıya çıxan avtomobillərin dövlət qeydiyyat nişanlarını avtomatik skan etmək olub.

    Flock-un hazırkı sistemində avtomobil nömrələrini oxuyan kameralar əsasən dirəklər və digər sabit nöqtələrdə quraşdırılır. Yeni layihə isə bu sistemi hərəkətli hala gətirə bilərdi. Bunun üçün Flock videoregistrator istehsalçısı Nexar ilə əməkdaşlıq etməyi planlaşdırıb. Nexar-ın kameralarından Uber və Lyft sürücüləri, eləcə də adi avtomobil sahibləri istifadə edir. Plan həyata keçirilsəydi, bu avtomobillər şəhərdə hərəkət etdikcə qarşılarına çıxan digər nəqliyyat vasitələrinin nömrələri qeydə alına və məlumatlar Flock-un sisteminə ötürülə bilərdi. Beləliklə, şirkətin müşahidə imkanları sabit kameralardan yüz minlərlə hərəkətdə olan avtomobilə qədər genişlənə bilərdi.

    Sənəd ABŞ-nin Corciya ştatında yaşayan bir şəxs tərəfindən ictimai məlumat sorğusu vasitəsilə əldə edilib. Məlumata görə, Flock bu layihəni Corciya Baş Prokurorluğuna təqdim etmişdi. Flock Safety 404 Media-ya bildirib ki, Nexar ilə nəzərdə tutulan layihə heç vaxt reallaşdırılmayıb. Buna baxmayaraq, sızdırılmış təqdimat şirkətin müşahidə şəbəkəsini hansı miqyasda genişləndirməyi nəzərdən keçirdiyini göstərir. Ən mühüm suallardan biri isə Uber və Lyft kimi şirkətlərin, eləcə də sürücülərin belə məlumatların toplanmasından xəbərdar olub-olmayacağıdır. Hazırda bununla bağlı dəqiq məlumat yoxdur.