Ford avtomobillərinə süni intellekt köməkçisi gətirir

    Ford avtomobil sahibləri üçün yeni süni intellekt əsaslı köməkçisini istifadəyə verməyə başlayıb. Yeni sistem avtomobil haqqında müxtəlif sualları cavablandıra, yanacaq səviyyəsi, təkər təzyiqi, yük və yedəkləmə imkanları kimi məlumatları istifadəçiyə təqdim edə biləcək. Yeni AI köməkçi ilkin mərhələdə Ford və Lincoln mobil tətbiqlərində çatbot formasında əlçatan olacaq. Tətbiq birbaşa istifadəçinin avtomobilinə bağlı olduğundan süni intellekt konkret avtomobilin modeli və texniki göstəriciləri ilə yanaşı, telemetriya sistemindən gələn aktual məlumatlardan da istifadə edə biləcək.

    Məsələn, sürücü növbəti səfər üçün nə qədər yanacağa ehtiyac olduğunu, avtomobilinin müəyyən çəkidə qayığı yedəkləyə bilib-bilməyəcəyini və ya servisə nə zaman ehtiyac yarana biləcəyini soruşa biləcək. Sistem avtomobilin istifadəçi təlimatındakı məlumatları da analiz edərək suallara cavab verəcək. Maraqlı funksiyalardan biri şəkillərin analizidir. Ford bildirir ki, istifadəçilər tətbiqə müəyyən yükün şəklini göndərərək avtomobillərinin həmin yükü daşımağa və ya yedəkləməyə uyğun olub-olmadığını öyrənə biləcəklər. Ford yeni köməkçini mərhələli şəkildə istifadəyə verir və nəticədə onu təxminən 8 milyon Ford və Lincoln sahibinə çatdırmağı planlaşdırır. Şirkət 2027-ci ildə isə AI köməkçini birbaşa avtomobillərin multimedia sisteminə inteqrasiya etməyi və səslə idarəetməni mümkün etməyi nəzərdə tutur.