Ford elektromobil strategiyasını dəyişir

    Technote.az “Engadget” platformasına istinadən bildirir ki, Ford elektrikli F-150 Lightning modelini yenidən formatlamağa qərar verib. Şirkət hazırkı tam elektrikli versiyanın istehsalını bu il dayandıracaq və növbəti nəsil modeli EREV (Extended Range Electric Vehicle), yəni benzin generatoru ilə dəstəklənən elektrikli avtomobil kimi təqdim edəcək.

    EREV konsepsiyası plug-in hibridə bənzəsə də, əsas fərq ondadır ki, avtomobil tam elektrik ötürmə sisteminə malik olur, benzin mühərriki isə yalnız batareyanı doldurmaq üçün generator rolunu oynayır. Ford-un açıqlamasına görə, yeni F-150 Lightning modeli 700 mildən (təxminən 1120 km) artıq yürüş məsafəsi təklif edəcək. Şirkət bildirir ki, 2030-cu ilə qədər qlobal satışlarının 50 faizi hibrid, genişləndirilmiş yürüşlü elektrikli (EREV) və tam elektrikli modellərdən ibarət olacaq. Hazırda bu göstərici cəmi 17 faizdir. Ford bu strategiya dəyişikliyinin şirkətə təxminən 19,5 milyard dollar mənfi maliyyə təsiri yaradacağını da etiraf edir.