Ford Pro AI: Avtomobil parklarının idarəetməsində yeni AI dövrü başlayır

    Technote.az “The Verge” platformasına istinadən bildirir ki, Ford Motor Company kommersiya avtomobil parklarının idarə olunmasını asanlaşdırmaq məqsədilə yeni süni intellekt əsaslı xidməti olan Ford Pro AI platformasını təqdim edib. Yeni sistem şirkətin telematika proqramından istifadə edən müştərilər üçün hazırlanıb və generativ süni intellekt vasitəsilə avtomobillərdən toplanan məlumatları analiz edərək menecerlərə praktik tövsiyələr təqdim edir.

     Ford Pro AI kommersiya nəqliyyat vasitələrindən əldə edilən sürət göstəriciləri, təhlükəsizlik kəməri istifadəsi, mühərrikin vəziyyəti və digər texniki məlumatları emal edir və bunları idarəçilər üçün konkret fəaliyyət addımlarına çevirir. Sistem telematika proqramı daxilində yerləşən AI çatbot formasında fəaliyyət göstərir və istifadəçilər park haqqında suallar verə, yanacaq xərclərini azaltmaq üçün tövsiyələr ala və ya hesabat məzmunlu e-poçt layihələri hazırlada bilirlər.

     Ford son illərdə məhsullarına süni intellekt texnologiyalarını daha aktiv inteqrasiya edir. Şirkət artıq AI vasitəsilə avtomobil dizayn prosesini sürətləndirir və mobil tətbiqində sərnişin avtomobili istifadəçilərinə müxtəlif praktiki sualları cavablayan çatbot təqdim edib.

     Yeni Ford Pro AI xidməti hazırda Ford Pro telematika proqramının 840 mindən çox ödənişli abunəçisi üçün nəzərdə tutulub. Sistem yalnız Ford markalı avtomobillərlə məhdudlaşmır. Məlumat ötürə bilən modemə sahib istənilən nəqliyyat vasitəsi platformaya qoşula bilər. Bu isə müxtəlif istehsalçıların avtomobillərindən ibarət kommersiya parklarının idarə edilməsinə uyğunlaşdırılıb.