Hyundai Elexio adlı yeni elektrikli SUV təqdim edilib

     Hyundai Elexio - Beijing Hyundai birgə müəssisəsi çərçivəsində xüsusi olaraq Çin bazarı üçün hazırlanmış tamamilə yeni elektrik krossoveridir. Bu, markanın Çində yaradılmış ilk elektromobilidir. O, Ioniq seriyası ilə əlaqəni kəsərək, yeni ad və orijinal dizaynla təqdim olunub. Yeni model Şanxayda keçirilmiş xüsusi tədbirdə nümayiş etdirilib. Elektromobilin texniki xüsusiyyətləri və ölçüləri hələ açıqlanmasa da, məlumdur ki, onun yürüş ehtiyatı 700 km-dən çoxdur - yəqin ki, bu, Çin CTLC dövriyyə standartına əsaslanır. Xarici görünüşünə əsasən, bu SUV digər ölkələrdə satılan Ioniq 9 modelindən daha kompakt təsir bağışlayır. Yeni dizayn dili Elexio modelini Hyundai-nin digər modelləri fonunda fərqləndirir.

     Ön hissədə radiator barmaqlığı yoxdur, əvəzində iri hava girişləri və faraların altında nazik LED işıq zolağı yer alır. Yan profildə relyefli qanadlar və vizual olaraq spoylerə keçən tündləşdirilmiş arxa sütunlar diqqət çəkir. Arxa hissədə isə yuxarıda yerləşdirilmiş üfüqi fənərlər, iri ölçülü brend adı yazısı və bamperdə qrafik elementlər mövcuddur. Salon hələ nümayiş etdirilməyib, lakin Hyundai “fiziki düyməsiz intellektual interfeys”, yeni rəqəmsal cihaz paneli və Qualcomm SA8295 prosessoru əsasında qurulmuş, ən müasir bağlantı funksiyalarını dəstəkləyən multimedia-əyləncə sistemi ilə təchizatın olacağını elan edib. Elexio həmçinin qismən avtonom idarəetmə funksiyaları olan sürücüyə yardım sistemi (ADAS) ilə təchiz ediləcək.

     Elektromobil artıq Hyundai, Kia və Genesis-in qlobal elektromobillərində istifadə olunan E-GMP platforması üzərində qurulub. Güc qurğusunun konfiqurasiyası hələ dəqiqləşdirilməyib, lakin bu arxitektura həm birmotorlu, həm də ikimotorlu versiyaları dəstəkləyir. Batareyanın tutumu da hələ açıqlanmayıb, lakin sürətli şarj dəstəyi təsdiqlənib: Batareya 30-dan 80 faizədək cəmi 27 dəqiqəyə enerji yığa bilər. Batareya bloku müasir toqquşma təhlükəsizliyi tələblərinə cavab verən möhkəmləndirilmiş konstruksiyada yerləşdirilib. Elexio-nun istehsalı Çində, Beijing Hyundai zavodlarında təşkil olunacaq. Yerli bazarda satışlar yaxın aylarda başlayacaq. Modelin Çindən kənarda satışa çıxarılıb-çıxarılmayacağı isə hələ məlum deyil.

Mənbə: Carscoops