Kaliforniya təcili yardıma mane olan robotaksilərə cərimə qanunu qəbul etdi

    Kaliforniya qubernatoru Gavin Newsom təcili yardım xidmətlərinə mane olan robotaksilərlə bağlı SB 1246 qanununu imzalayıb. Yeni qaydaya görə, sürücüsüz avtomobil fövqəladə vəziyyət zamanı təcili yardım və ya yanğınsöndürmə maşınının yolunu 30 dəqiqədən çox bağlasa, operator şirkət cərimələnəcək. Qanun 1 iyul 2028-ci ildə qüvvəyə minəcək.

    Şəhər və dairələr qaydanı pozan operatorları məhkəməyə verə biləcək. Ümumi pozuntulara görə cərimə 5000 dollara (8500 manat) çata bilər. Rəsmi şəxslər yerli texnik çağırılmasını tələb etdikdən sonra fövqəladə əməliyyata 30 dəqiqədən çox mane olan hər avtomobil üçün 10 000 dollara (17 000 manat) qədər cərimə kəsilə bilər. Qəza, nasazlıq və ya yolun bağlanması zamanı şirkətlər hadisə yerinə yerli texnik göndərməlidir.

    Operatorlar hadisə yerində təcili xidmətlərlə əlaqə saxlayan əməkdaş da saxlamalıdır. Bütün sistemdə nasazlıq yaranarsa, şirkət avtomobillərin yeri və vəziyyəti barədə yerli qurumlara məlumat verməlidir. Hadisələrə nə qədər vaxtda reaksiya verildiyi də ayrıca hesabatlarda göstərilməlidir. Avtomobili uzaqdan idarə edən şəxslər ABŞ ərazisində olmalı və ABŞ sürücülük vəsiqəsi daşımalıdır. “Tesla” belə uzaqdan müdaxiləni yalnız digər seçimlər nəticə vermədikdə planlaşdırır. “Waymo” isə ilişib qalan avtomobillərə bəzən xaricdəki operatorların göstəriş verdiyini açıqlayıb.

    Qanun bir neçə ciddi hadisədən sonra gündəmə gəlib. 2025-ci ilin dekabrında San Fransiskoda elektrik kəsintisi işıqforları sıradan çıxarıb. Nəticədə “Waymo” şirkətinin təxminən 1500 avtomobili yollarda dayanıb. 2026-cı il 4 iyul tədbirləri zamanı da sıx tıxacda enerjisi bitən “Waymo” avtomobilləri küçələrdə qalıb. Onların bir hissəsini evakuatorla aparmaq lazım gəlib.

    Kaliforniyadan kənarda da oxşar hadisə qeydə alınıb. Texas ştatının Ostin şəhərində “Waymo” robotaksisi atışma yerinə gedən təcili yardım avtomobilinin yolunu bağlayıb. ABŞ Milli Avtomobil Yollarında Hərəkət Təhlükəsizliyi Administrasiyası iyulda sürücüsüz avtomobillərin polisə və təcili xidmətlərə mane olması hallarının artdığını açıqlayıb. Qurum operatorları problemi həll etməyə çağırıb.

    Yeni məhdudiyyətlər robotaksi xidmətlərinin Kaliforniyada genişləndiyi vaxta təsadüf edir. “Waymo” San Fransisko körfəzi bölgəsində, Los Ancelesdə və San Dieqoda ödənişli sürücüsüz səfərlər keçirir. “Amazon” şirkətinin “Zoox” xidməti San Fransiskoda seçilmiş sərnişinlərə məhdud sayda pulsuz səfər təşkil edir. “Tesla”nın ştatda avtonom avtomobilləri sınaqdan keçirmək icazəsi var. “Waymo” yeni dəyişikliklərin xidməti davam etdirməyə şərait yaratdığını deyib.