Lyft və Baidu Londonda robotaksi sınaqlarına başlayıb

    Çinin texnologiya nəhəngi Baidu və ABŞ-nin nəqliyyat platforması Lyft Londonda sürücüsüz taksilərin sınaqlarına başlayıb. Sınaqlarda Baidu-nun Apollo Go RT6 robotaksilərindən istifadə olunur. İlkin mərhələdə avtomobillər tamamilə sürücüsüz hərəkət etməyəcək. Təhlükəsizliyi təmin etmək və sistemin fəaliyyətini izləmək üçün avtomobillərin daxilində test sürücüləri olacaq. Sınaqlar əsasən Londonun Brent rayonunda aparılacaq və burada onlarla Apollo Go RT6 avtomobilinin istifadəsi planlaşdırılır.

    Layihədə Lyft-in ötən il satın aldığı Almaniyanın taksi platforması Freenow da iştirak edir. Gələcəkdə sərnişinlərin robotaksiləri məhz Lyft və Freenow infrastrukturu vasitəsilə sifariş etməsi nəzərdə tutulur. Xidmətin “Freenow by Lyft” adı altında fəaliyyət göstərməsi və 2027-ci ildə adi istifadəçilərin robotaksi sifariş edə bilməsi planlaşdırılır. Lyft və Baidu əməkdaşlığının daha böyük məqsədi Avropada minlərlə avtonom avtomobil istifadəyə verməkdir. Freenow-un Böyük Britaniya və Almaniyadakı geniş taksi şəbəkəsi Lyft-ə bu planı daha sürətli həyata keçirməyə imkan verə bilər.