Nuro San-Fransiskoda robotaksi xidmətinə start verməyə hazırlaşır

    Technote.az “The Verge” platformasına istinadən bildirir ki, Robotaksi sahəsində hazırda liderlik əsasən Waymo-nun əlində olsa da, ABŞ şirkəti Nuro hesab edir ki, bazara ikinci böyük oyunçu kimi daxil olmaq əslində üstünlük yarada bilər. Şirkət bildirir ki, Waymo-nun illərlə topladığı təcrübə və qarşılaşdığı problemlər Nuro üçün bir növ “hazır dərs” rolunu oynayır. Google-un avtonom avtomobil layihəsinin keçmiş əməkdaşları tərəfindən yaradılan Nuro əvvəlcə çatdırılma robotları üzərində çalışsa da, 2024-cü ildə strategiyasını dəyişərək robotaksi bazarına yönəlib. Şirkət artıq Uber və Lucid ilə əməkdaşlıq çərçivəsində ABŞ-də on minlərlə robotaksi istifadəyə verməyi planlaşdırır. İlk xidmətin isə bu ilin sonuna doğru San-Fransiskoda işə salınacağı gözlənilir.

    Nuro-nun həmtəsisçisi və baş direktoru Dave Ferguson bildirib ki, Waymo-nun həm uğurları, həm də qarşılaşdığı çətinliklər onların mühəndisləri üçün mühüm analiz mənbəyinə çevrilib. Şirkət bu təcrübələrdən istifadə edərək sistemlərini daha təhlükəsiz və etibarlı etməyə çalışır. Şirkətin robotaksi modeli də fərqli yanaşma üzərində qurulub. Belə ki, Nuro avtonom idarəetmə texnologiyasını hazırlayır, Lucid bu sistemi avtomobillərə inteqrasiya edir, Uber isə nəqliyyat parkını idarə edən tərəf olacaq. Robotaksilər Lucid Gravity SUV modeli əsasında hazırlanacaq və zavoddan birbaşa Level 4 avtonom idarəetmə ilə çıxacaq. Nuro həmçinin xidmətə başlanğıc mərhələsində məhdud ssenarilərlə yox, daha geniş istifadə imkanları ilə daxil olmağı planlaşdırır. Şirkət hesab edir ki, robotaksilər ictimai etimad qazanmaq üçün ilk gündən real və faydalı xidmət təqdim etməlidir.