Rivian elektromobil satış proqnozunu artırdı

    Rivian 2026-cı il üzrə satış proqnozunu artırıb. Şirkət ikinci rübdə istehsal və çatdırılma göstəricilərinin gözləniləndən daha yaxşı nəticə verməsindən sonra bu il daha çox avtomobil satacağını açıqlayıb. Rivian daha əvvəl 2026-cı ildə 62-67 min avtomobil təhvil verməyi planlaşdırırdı. Lakin şirkət yeni proqnozunda bu rəqəmi 65-70 min avtomobilə yüksəldib.

    Bu artım ilk baxışdan kiçik görünsə də, şirkət üçün əhəmiyyətli hesab edilir. Belə ki, Rivian ötən il ümumilikdə 42 247 elektrikli avtomobil satmışdı. ABŞ-də elektromobil bazarında artım tempinin zəiflədiyi, hökumətin 7 500 dollarlıq federal elektromobil vergi güzəştini ləğv etdiyi və bəzi ekoloji təşviqlərin dayandırıldığı bir dövrdə proqnozun artırılması diqqət çəkir. Şirkətin açıqlamasına görə, ikinci rübdə 12 613 avtomobil istehsal olunub, 12 194 avtomobil isə müştərilərə təhvil verilib. Halbuki Rivian həmin dövr üçün cəmi 9-11 min avtomobil çatdırmağı gözləyirdi.

    Güclü nəticələrdə əsas rol oynayan amillərdən biri şirkətin yeni kütləvi bazar modeli olan R2 SUV-un satışa çıxarılmasıdır. Təxminən 58 min dollar başlanğıc qiymətinə malik olan modelə tələbatın yüksək olduğu bildirilir. Bununla yanaşı, Rivian hələ də maliyyə çətinlikləri ilə mübarizə aparır. Şirkət əvvəllər 2027-ci ildə sabit mənfəət əldə etməyi planlaşdırsa da, avtonom idarəetmə texnologiyalarına investisiyaları artırdığı üçün bu hədəfi təxirə salıb. Buna səbəblərdən biri də Uber ilə imzalanan və özünüidarə edən R2 avtomobillərinin tədarükünü nəzərdə tutan yeni əməkdaşlıqdır.