Rivian zavod gücünü 50 % artırır

    Technote.az “TechCrunch” platformasına istinadən bildirir ki, ABŞ-nin elektrik avtomobil istehsalçısı Rivian yeni zavod layihəsi ilə bağlı maliyyələşmə planında dəyişiklik edib. Şirkət ABŞ Energetika Nazirliyi (DOE) ilə razılaşmasını yenidən işləyərək əvvəl nəzərdə tutulan 6.6 milyard dollarlıq kredit məbləğini 4.5 milyard dollara endirib.

    Rivian bu krediti planlaşdırılandan daha tez, 2027-ci ilin əvvəlində istifadə etməyə başlayacağını açıqlayıb. Kredit Georgia ştatında tikilən yeni zavodun maliyyələşdirilməsi üçün nəzərdə tutulub. Şirkət eyni zamanda zavodun ilkin istehsal gücünü də artıraraq illik 200 min avtomobildən 300 min avtomobilə çatdırmağı planlaşdırır. Bu, əsasən yaxın gələcəkdə təqdim ediləcək R2 modelinə olan yüksək gözləntilərlə izah olunur.

    Yeni zavod yalnız fərdi istifadə üçün avtomobillər deyil, həm də avtonom nəqliyyat vasitələrinin istehsalına xidmət edəcək. Uber ilə əldə olunan razılaşmaya əsasən, şirkət ilkin olaraq 300 milyon dollar sərmayə yatıracaq və 2028-ci ildən başlayaraq 10 min ədəd tam avtonom R2 robotaksi alacaq. Gələcəkdə bu sayın 40 minə qədər artırılması mümkündür. Ümumilikdə Uber-in 2031-ci ilə qədər Rivian-a 1.25 milyard dollara qədər sərmayə qoymaq imkanı var.

    Zavodun tikintisinə 2025-ci ilin sonlarında başlanılıb və hazırda əsas tikinti işləri davam edir. Rivian burada istehsala 2028-ci ilin sonuna qədər start verməyi planlaşdırır. Bu müddətə qədər isə R2 modelləri şirkətin Illinois ştatındakı mövcud zavodunda istehsal olunacaq. Şirkətin maliyyə göstəricilərinə gəlincə, 2026-cı ilin birinci rübündə Rivian 1,38 milyard dollar gəlir əldə edib. Bunun 908 milyon dolları avtomobil satışlarından, 473 milyon dolları isə proqram təminatı və xidmətlərdən formalaşıb. Bununla belə, şirkət hələ də zərərdədir. Rüblük xalis zərər 416 milyon dollar təşkil edib. Bu rəqəm ötən ilin eyni dövrü ilə müqayisədə azalsa da, xərclərin, xüsusilə də tədqiqat və inkişaf (R&D) büdcəsinin artması diqqət çəkir.

    Rivian-ın R&D xərcləri 20 % artaraq 458 milyon dollara yüksəlib. Şirkət bu vəsaiti əsasən R2 modelinin istehsala hazırlığı və avtonom texnologiyaların inkişafına yönəldib. Nəticədə sərbəst pul axını mənfi olaraq qalır və 1 milyard dollara yaxın zərər qeydə alınıb.